Býrabaı keremeti: Tabıǵı qoryqtaǵy sholý alańdary qalaı ózgerdi
ASTANA. KAZINFORM - Bólektaý taýy, Aıýtas pen Kebistas, Moınaq, Maksımka jartasy men Imanaı bulaǵy jáne Mahabbat alańy. Qazir Býrabaıdaǵy sholý alańdary osylaı atalady. Barlyǵy jeti alań jańardy. Kazinform agenttiginiń tilshisi ulttyq tabıǵı parkke baryp, tańǵajaıyp mekenniń jańa kelbetin kórip keldi.
«Bólektaý» taýy endi alpınıster marshrýty ǵana emes. Buǵan deıin taıǵanaq tastar joǵary kóterilýge kedergi keltirse, qazir baspaldaqpen júrýge bolady. Al joǵary kóterilgende sizdi búrkit beınesindegi art nysany bar ortalyq alań kútedi. Týrıster bul alańǵa shoǵyrlanyp, kóp ýaqytyn ótkizedi. Sebebi joǵarydan tómen qaraǵan adam Býrabaıdyń tumsa tabıǵatyna kóz júgirtedi.
- Ásem tabıǵatty tamashalaý úshin jaıly jaǵdaı jasaldy. Jańa jobany iske asyrý kezinde birde-bir aǵash kesilmedi, tabıǵatqa zııan keltirilmedi. Bári de óz tabıǵı qalpyn saqtap qaldy. Máselen «Bıshi qaıyńdy» parki otbasymen birge tynyǵýǵa arnalǵan meken. Munda jasandy tastan jasalǵan túrli músin bar, oryndyqtar qoıylyp, tabıǵat aıasyna tamaqtanýǵa arnalǵan oryn jasaldy,- dedi «Arhı prosto» kompanııasynyń bas dırektory Dastan Smaǵulov.
«Kúıgen múıiste» de sholý alańy bar. Kıiz úı pishindes alańda fotoǵa túsip, kúnniń batýyn tamashalaýǵa bolady.
Býrabaı men Úlken Shabaqty arasynda taǵy bir sholý alańy ornalasqan. Bul jerden birden eki ózendi kórýge bolady.
Qaýipsizdik sharasyna erekshe nazar aýdaryldy. Aǵashtarǵa jáne tireýlerge 35 «aqyldy» beınekamera ornatyldy jáne SMART júıesine qosyldy. Munda týrısterdiń marshrýtyn tolyq kórýge bolady. Tipti tabıǵatty qorǵaý talaptaryn eskermegender de tirkeledi.
«Mahabbat alańy» - romantıkalyq oryn. Bul bala-shaǵasymen birge tynyqqan otbasy úshin taptyrmas meken. Keshkilik tynyshtyq ornap, tek jeldiń dybysyn, aǵashtardyń sybdyryn estýge bolady. Jańarǵan Býrabaıdyń búgingi keıpi osyndaı.
Buǵan deıin Aqmola oblysynyń ákimi Býrabaıdaǵy jerlerge qatysty taraǵan aqparatqa túsinikteme berdi.