«BURABAY ICE 2023»: Qazaqstan tarıhynda alǵash ret muzda júgirýden halyqaralyq jarys ótedi
«BURABAY ICE 2023» jarysy naǵyz trail running jankúıerleriniń basyn qosady. QR Prezıdentiniń Іs Basqarmasyna qarasty «Býrabaı-Damý» JShS, «Ekstremaldy Atletıka» qoǵamdyq birlestigi jáne «Rebel Running» JK birlesip arqanyń qatal qysyna, yzǵarly jeline jəne krıstal muzyna qarsy turatyndarǵa osyndaı erekshe synaq daıyndap otyr.
«Qys mezgilinde kóldiń muzaıdynynda buqaralyq sport jarysyn ótkizý elimizde buryn-sońdy bolyp kórgen emes. Biz alǵash ret qolǵa alyp otyrmyz. Tabıǵaty ásem Býrabaı óńirinde, aty ańyzǵa aınalǵan Jumbaqtastyń janyndaǵy ekstermaldy saıys óte qyzyqty ótedi degen senimimiz mol. Árıne, áýesqoı sportshylar úshin bul synaq ońaıǵa túspeıdi. Degenmen, osyndaı synaq adamnyń erik-jigerin shyńdaýǵa da kómektesedi.
«Býrabaı-Damý» seriktestiginiń maqsaty – osyndaı is-sharalar arqyly óńirdiń ásem tabıǵatyn jurtshylyqqa nasıhattaı otyryp, týrısterdiń qyzyǵýshylyǵyn arttyrý, sondaı-aq salaýatty ómir saltyn nasıhattaý. Bizdiń kompanııanyń qurylǵanyna bıyl 8 jyl tolady, sol sebepti bıyl osyndaı is-sharalar kóbirek ótkiziledi», - deıdi «Býrabaı-Damý» JShS bas dırektorynyń orynbasary Qasymjan Kenjeshov.
Jarys birneshe qashyqtyqta ótedi: 7 km, 14 km jəne 21,1 km júgirý nemese 7 km skandınavııalyq júris. Bul jarysqa kez kelgen jastaǵy sportshylar men jastar qatysa alady. Búginge deıin 200-den astam sportshy tirkeldi. Olardyń arasynda AQSh, Kanada, Afrıka, Eýropa elderiniń, Ózbekstan, Qyrǵyzstan, Mońǵolııa sportshylary, sondaı-aq Qazaqstannyń barlyq oblystarynyń sportshylary bar. Tirkeý áli jalǵasyp jatyr.
Aıta keteıik, jarys 19 aqpan kúni saǵat 10:00-de Býrabaı kólindegi qaıyq stantsııasynda bastalady. Márege jetken sportshylardyń qaı-qaısysy da júldesiz qalmaı, barlyǵy marapattalady.
