Býrabaı haıýanattar baǵynda 30 túrli janýar men qus meken etedi
KÓKShETAÝ. KAZINFORM – Býrabaı kýrortynyń haıýanattar baǵy jyl boıy jumys isteıdi. Qazir munda janýarlar men qustardyń 30 túrin mamandar kútip, baǵyp otyr. Onyń ishinde qustardyń 10 túri bar. Olar haıýanattar baǵyna túrli sebeppen túsken, kóbisi jabaıy tabıǵatta jaraqat alǵandar, aralarynda jyrtqysh qustar da bar.
Býrabaı kentindegi haıýanattar baǵy 1976 jyly «Qutqarylǵan janýarlarǵa arnalǵan úı» retinde qurylǵan. Sol kezde jaralanǵan janýarlar men qustar osy ortalyqty panalaǵan.
Jyl qustary qysta arnaıy qysqy baqshaǵa ornalastyrylady, al mamyrda qorshaýlar men toǵandarǵa shyǵarylady. «Býrabaı Damý» JShS baspasóz qyzmetiniń málimetinshe, haıýanattar baǵynda qustardyń úlken kollektsııasy bar, ekeýi qyzyl kitapqa engizilgen, olar - búrkit pen dala qyrany.
Qysta qustar ádettegiden jıi qorektenedi. Azyǵy da san alýan: úgilgen arpa, usaqtalǵan kókónister, tartylǵan et, tartylǵan balyq, sıyr eti, tamaq qaldyqtary, balyq maıy, jem-shóp qabyǵy, dárýmender.
Búrkit pen dala qyrany bólek ornalastyrylǵan, al taýys, mysyr taýyǵy, qyrǵaýyl, taýyq, kúrketaýyq, dala úıregi, úıdiń úıregi, aqqý birge turady.
«Haıýanattar baǵy jyl saıyn jaralanǵan ań-qustarmen tolyǵyp otyrady. Ásirese kúzde, jyly jaqqa ushyp kete almaǵan qustardy osyndaǵy veterınar mamandar óz qamqorlyǵyna alady. Kóktemde qanattary qataıyp, saýyqqan kezde ózderiniń tabıǵı ortasyna jiberiledi», - deıdi «Býrabaı Damý» JShS baspasóz qyzmetinen.
Býrabaı kýrortynyń haıýanattar baǵyn QR PІB «Býrabaı Damý» JShS basqarady.
Jalpy, «Býrabaı» memlekettik ulttyq tabıǵı parkiniń aýmaǵynda qustardyń 197 túri mekendeıdi, olardyń 14-i Qazaqstannyń Qyzyl kitabyna engizilgen.
Haıýanattar baǵy demalyssyz jumys isteıdi, jumys kestesi qys aılarynda 10:00-den 18:00-ge deıin. Bes jasqa deıingi balalarǵa kirý tegin.
Aıta ketsek, budan buryn oqýshylar «Býrabaı» ulttyq parkinde qustarǵa jem salatyn astaýlar ornatqanyn jazǵan edik.
