Býrabaı aýdanynyń avtomobıl joldaryna eki mıllıardtan astam teńge bólindi
KÓKShETAÝ. QazAqparat - Bıyl Býrabaı aýdanynyń avtomobıl joldaryna eki mıllıardtan astam teńge bólindi. Bul qarajatqa aýdan ortalyǵynyń ishki joldary, Býrabaı kentiniń ınfraqurylymy jańǵyrtyldy. Іri jol qurylysy mádenıet - Zelenyı bor baǵytynda júrgizilýde. Aǵymdaǵy jyly «Jumyspen qamtýdyń jol kartasy» baǵdarlamasy aıasyndaǵy jobaǵa 600 mıllıon teńgeden astam qarjy baǵyttaldy. 2021 jylǵa da aıtarlyqtaı qarajat qarastyrylǵan, dep habarlaıdy QazAqparat tilshisi oblystyq ishki saıasat basqarmasyna silteme jasap.
Mádenıet-Zelenyı bor baǵytyndaǵy joldy jóndeýge bıýdjetten 1,2 mıllıard teńge bólindi. Qazirgi ýaqytta merdiger 600 mıllıon teńge somasyna jumystardy júzege asyrdy. Kelesi jyly 400 mıllıon qarastyrylǵan. Bul qarajatqa qalǵan 12 shaqyrym jóndeledi. Jumyspen qamtý ortalyǵy arqyly 75 adam jumysqa ornalastyryldy.
«15 shaqyrym jol jóndeldi: Mádenıet jáne Jańatalap aýyldarynyń arasyndaǵy 10 shaqyrym jol jáne Jańatalap aýylynan Jasyl bor baǵytynda 5 shaqyrym jol. Joldyń jalpy uzyndyǵy 27 shaqyrymdy quraıdy. Joldyń 12 shaqyrymyn jóndeý ǵana qaldy», - dedi Býrabaı aýdany ákiminiń orynbasary Erlan Bıdanov.
Oblys ákimi jol tóseminiń durys paıdalanylýyn qadaǵalaýdy tapsyrdy. Tsement zaýytynyń júk mashınalary óz júkteri esebinen jańartylǵan ýchaskelerdi zaqymdaýy múmkin.
«Jol-halyq úshin de, bıznes úshin de eń basty qajettilik. Sapaly jol óńirdiń ınvestıtsııalyq tartymdylyǵyn arttyrady. Jańa joldyń sapasyn únemi qadaǵalap otyryńyz. Zaozernyı, Donskoı baǵyttary boıynsha «Kokshetsement» aýyr júkteri ótedi. Bul aımaqta qıyrshyq tasty karerler de bar. Belgilengen mólsherden artyq júk tasymalyn boldyrmaý úshin jol polıtsııasy qyzmetine tapsyrma berý qajet. Tıisti jol belgileri ornatylýy tıis», - dep atap ótti oblys ákimi Ermek Marjyqpaev.
Aǵymdaǵy jyly Şýchınsk qalasy men Býrabaı kentiniń ishki joldaryn jóndeý bastaldy. Alaıda merdigerdiń nemquraılylyǵyna baılanysty keıbir kóshelerdiń qurylysy kelesi jylǵa aýystyryldy. Oblys ákimi 2021 jylǵa arnalǵan jumys josparyn pysyqtaýdy jáne qurylys sapasyn muqııat qadaǵalaýdy tapsyrdy.
