Býrabaı aýdanynda taýarly-sút fermasy ashyldy – Aqmola oblysy
Atameken aýylynda «B.D.Ábdirahmanov» jeke kásipkerligi ashqan fermaǵa Reseı jáne Túrkııada shyǵarylǵan barlyǵy 32,3 mıllıon teńgeniń jabdyqtary ornatylǵan. Munda sútti óndirip, salqyndatýǵa jáne saqtaýǵa bolady. Sharýashylyq menshiginde 109 jylqy, 480 bas iri qara bar.
Sharýashylyq basshysy Bolat Ábdirahmanovtyń aıtýynsha, ol «Aýyl sharýashylyǵyn qarjylaı qoldaý qory» aktsıonerlik qoǵamy arqyly 500 bas sımmental sıyrlaryn satyp alǵan. Al, memleketten alǵan nesıesiniń bir bóligin mal azyǵyn daıyndaýǵa qajetti aýyl sharýashylyǵy tehnıkalaryn satyp alýǵa jumsaǵan. Qalǵanyna qazirgi zamanǵa saı jabdyqtalǵan birneshe mal qorasyn salǵan.
«Qazirgi ýaqytta sútti baǵyttaǵy 500-ge jýyq sıyrym bar. Odan alynǵan sútti jetkizý jóninde bekitken kelisimsharttarymyz bar. Jyl saıyn sút tapsyrý kólemin de arttyryp kelemiz. Memlekettik qoldaýdyń arqasynda sharýashylyǵymyz óz deńgeıinde damyp jatyr. Endigi josparym – mal basyn kóbeıte túsý», – deıdi sharýashylyq basshysy Bolat Ábdirahmanov.
Nysannyń ashylýyna qatysqan Ǵalymjan Ábdiqalyqov taýarly-sút fermasyn ashýda memlekettiń baǵdarlamanyń tıimdi ekenin atap ótti.
«Búgingi memleket tarapynan kórsetilip otyrǵan qoldaý kómek jetkilikti. Sony durys paıdalanyp qalýymyz kerek. Jalpy, etti mal sharýashylyǵynan góri, sútti mal sharýashylyǵyn qolǵa alǵan tıimdi», – deıdi Ǵ.Ábdiqalyqov.
Sonymen qatar, ol oblystaǵy keıbir sút zaýyttarynyń tolyq qýatyna shyqpaı otyrǵanyn aıtyp, taýarly-sút fermasyn ashqan kásipker sút satyp alatyn tutynýshy izdep bas qatyrmaıtynyn eske saldy. Osyǵan oraı, kásipkerdiń tabysy da joǵary bolady. Tabys kóp bolǵan soń jańa tehnıka alyp, mashına-traktor parkin qazirgi zamanǵy ónimdiligi joǵary tehnıkalarmen jańartýǵa da múmkindigi bar. Ony osy kúni «B.D.Ábdirahmanov» jeke kásipkerliginiń bazasynyń aýmaǵynda turǵan qazirgi zamanǵy egis quraldarynan-aq ańǵarýǵa bolady.
