Býrabaı aýdanynda kommýnaldyq qyzmetterge tarıf tómendedi

KÓKShETAÝ. KAZINFORM – Aqmola oblysy Býrabaı aýdany prokýratýrasynyń qyzmetkerleri turmystyq qatty qaldyqtardy jınaýǵa, tasymaldaýǵa jáne kómýge arnalǵan tarıfti qalyptastyrý kezindegi zańnamanyń buzylýyn anyqtady.

Máselen, qadaǵalaý vedomstvosy elektr jáne jylý energııasy, ǵımarattar men qurylystardy ustaý, sondaı-aq amortızatsııaǵa arnalǵan shyǵyndardy tarıftik smetaǵa negizsiz engizý faktilerin anyqtady.

Atalǵan buzýshylyqtar boıynsha prokýratýra prokýrorlyq qadaǵalaý aktisin engizdi.

«Nátıjesinde abattandyrylǵan úıde turatyn bir turǵynǵa tarıftiń quny 37,70 teńgege (QQS qospaǵanda 1 tekshe metr úshin 420 teńgeden 382,30 teńgege), al abattandyrylmaǵan úıler úshin 40,91 teńgege (QQS qospaǵanda 1 tekshe metr úshin 455,85 teńgeden 414,94 teńgege) tómendetildi. Kináli laýazymdy tulǵalar jaýapkershilikke tartyldy», — dep jazdy vedomstvodan.

Osylaısha, 10 173 týtynýshynyń, onyń ishinde 183 zańdy tulǵanyń múddeleri qorǵaldy.