Býrabaıdaǵy jarylystan zardap shekkenderge qandaı kómek kórsetildi
BÝRABAI. KAZINFORM — Býrabaı aýdany ákimdigi «Palaý ortalyǵy» dámhanasyndaǵy apattan zardap shekkender men qaza bolǵandardyń otbasylaryna qandaı kómek kórsetilgenin aıtty.
Ákimdik óziniń Instagram paraqshasynda jarııalaǵan aqparatqa sáıkes, toǵyz qaza bolǵan adamnyń ár otbasy ákimdiktiń qarajatynan 2 mln teńge alǵan. Sonymen qatar, kafeniń basshylyǵy qaza bolǵandardyń ár otbasyǵa 2 mln teńge tóledi jáne jerleý rásiminiń shyǵyndaryn óz moınyna aldy.
— Qazirgi ýaqytta statsıonarda jatqan 11 adamnyń segizine 1 mln teńgeden, ambýlatorlyq emdeýdegi 8 adamǵa 400 myń teńgeden tólem jasaldy. Kafe basshylyǵy zardap shekkenderge barlyǵy 6 mln teńge tóledi, — dep habarlady vedomstvo ókilderi.
Sonymen qatar, bıznestiń ókilderi zardap shekkender men qaza bolǵandardyń otbasylaryna qosymsha kómek kórsetken. Olar zardap shekkender men qaza bolǵandardyń nesıelerin tólep, 6 mln 580 myń teńge kóleminde qoldaý kórsetti.
Ákimdik komıssııasynyń jumysy áli jalǵasyp jatyr.
Eske sala keteıik, 26 aqpannan 27 aqpanǵa qaraǵan túni Şýchınsk qalasyndaǵy «Tsentr plova» kafesinde gaz-aýa qospasynyń jarylysy bolǵan.
Oqıǵa saldarynan 9 adam qaza taýyp, taǵy 26 adam jaraqat aldy.
Atalǵan derek boıynsha QR Qylmystyq kodeksiniń 292-babynyń 3-bóligi — «Órt qaýipsizdigi talaptaryn buzý, abaısyzda eki nemese odan da kóp adamnyń ólimine ákelip soǵý» boıynsha qylmystyq is qozǵaldy. Mekeme ıesi ustaldy.
Artynsha Kókshetaý mamandandyrylǵan tergeý soty Şýche qalasyndaǵy «Palaý ortalyǵy» kafesiniń ıesin qamaýǵa alý týraly sheshim shyǵardy.