Bultartpaý sharasynyń ózgerýi taǵylǵan aıyptyń alynǵanyn bildirmeıdi – Adam quqyqtary jónindegi ýákil

NUR-SULTAN. QazAqparat – Qazaqstandaǵy adam quqyqtary jónindegi ýákil Elvıra Ázimova qańtar oqıǵasyna baılanysty neshe adamnyń qamaýda otyrǵanyn aıtty, dep habarlaıdy QazAqparat tilshisi.

«10 qańtardaǵy jaǵdaı boıynsha Bas prokýratýra 1000-nan astam adamnyń qamaýda otyrǵany týraly aıtqan bolatyn. 19 aqpandaǵy jaǵdaı boıynsha 724 azamat qamaýda otyr. Ustalǵandardyń sany qamaý sharalaryn eshqaıda ketpeý týraly qolhat, úıqamaq, kámeletke tolmaǵandardyń týystarynyń kepilgerligi sııaqty bostandyqty shekteýmen baılanysy joq balama sharalarmen aýystyrýdyń arqasynda azaıdy. Biraq ázirge bul azamattarǵa taǵylǵan aıyp alynbaǵanyn túsiný kerek. Sotta qaralýy qajet», - Elvıra Ázimova.

Sondaı-aq, óz atyna osy másele boıynsha azamattardan 80-nen astam shaǵym kelip túskenin aıtty.

«Onyń jartysy ustaý kezinde jáne ustalǵannan keıingi 48 saǵattyń ishinde qatygezdikpen kúsh qoldaný jáne tergeýdiń zańǵa qaıshy tásilderi boıynsha túsken. Ustalǵan azamattardan túsken shaǵymnyń bárin biz tekserý júrgizip, qylmystyq is qozǵatý úshin Bas prokýratýraǵa jiberemiz. Biz ustalǵandarmen, olardyń týystarymen kezdesip, sol kezdesýler qorytyndysy boıynsha prokýratýranyń, oblys jáne qala ákimdiginiń ókilderimen kelissóz júrgizemiz», - dedi Adam quqyqtary jónindegi ýákil.