Prokýratýra Mańǵystaýdaǵy biregeı óndiris jobasynyń shıkizat máselesin sheshti
ASTANA. KAZINFORM — Mańǵystaýda munaı shtangalaryn armatýraǵa aınaldyratyn zaýytqa qoldaý kórsetildi, dep habarlaıdy oblystyq prokýratýranyń baspasóz qyzmeti.
Mańǵystaý oblysynyń prokýratýrasy Investorlardyń quqyqtaryn qorǵaý komıtetimen birlesip, armatýra óndiretin zaýyt salý jobasyn júzege asyryp jatqan «Hadid» JShS-ne qoldaý kórsetti.
Jobaǵa salynǵan ınvestıtsııa kólemi 250 mln teńgeni quraıdy, 35 jumys ornyn ashý kózdelgen. Jobanyń biregeıligi — munaı óndirýde paıdalanylǵan sorǵy shtangalaryn qurylys armatýrasyna qaıta óńdeýde. Bul tehnologııa qaıtalama resýrstardy utymdy paıdalanýǵa, ekologııalyq júktemeni tómendetýge jáne qurylys materıaldarynyń otandyq óndirisin damytýǵa yqpal etedi.
— Anyqtalǵandaı, jobany iske asyrý barysynda ınvestor shıkizattyń (qara metall synyǵynyń) tapshylyǵyna tap bolyp, bul óndiristiń turaqtylyǵyna qaýip tóndirgen. Qabyldanǵan sharalardyń nátıjesinde «Hadid» JShS men «Qarajanbasmunaı» AQ arasynda qajetti shıkizatty jetkizý jóninde memorandým jasalyp, jobany odan ári iske asyrý qamtamasyz etildi, — delingen habarlamada.
Mańǵystaý oblysynyń prokýratýrasy ákimshilik kedergilerge tap bolǵan ınvestorlardy +7 (701-33) 3-13-12, +7 (700) 215-06-72 telefony nemese 115 Call-ortalyǵy arqyly habarlasýǵa shaqyrady.
Budan buryn Semeıde janarmaı beketi jelisin salyp jatqan ınvestordyń quqyǵy qorǵalǵanyn jazdyq.
