Býllıngpen kúres: balalar ýákilderine jabyq mekemelerge kedergisiz kirý quqyǵy berildi
ASTANA. KAZINFORM — Qazaqstanda bala quqyqtary jónindegi ýákilder ınstıtýty endi býllıng pen qatygezdik jaǵdaılaryna basqa qurylymdardan táýelsiz ári jedel áreket etetin bolady.
Bul týraly Ortalyq kommýnıkatsııalar qyzmeti alańynda 1 maýsym — Halyqaralyq balalardy qorǵaý kúnine oraı uıymdastyrylǵan baspasóz májilisinde QR Oqý-aǵartý vıtse-mınıstri Shynar Aqparova aıtty.
— Zańsyzdyqtardyń aldyn alýdyń tıimdi tetigi retinde ýákil ókilderine balalar ornalasqan barlyq uıymǵa, sonyń ishinde jabyq mekemelerge de kedergisiz kirý quqyǵy berildi. Osylaısha, árbir keleńsiz jaǵdaı ýákilderdiń jeke baqylaýynda bolady jáne bul barlyq memlekettik organnyń qyzmetin tıimdi úılestirýge múmkindik beredi, — dedi spıker.
Budan bólek jıynda kámeletke tolmaǵandar arasynda zańǵa baǵynýshylyq mádenıetti qalyptastyrý jaıly sóz boldy. Máselen, 2025-2026 oqý jylynda Talǵar aýdanyndaǵy 10 mektep pen 3 kolledjde «Zań jáne Tártip» ıdeologııasy aıasynda arnaıy sabaqtar engizilgen.
— Bul pılottyq joba «Qazaqstan balalary» tujyrymdamasy aıasynda elimizdiń basqa óńirlerinde de aýqymdy túrde jalǵasyn taýyp otyr. Oǵan qosa, qazirgi tańda balabaqshalar men mektepterde jáne kolledjderde 100% «Qaýipsizdik sabaqtary» ótip, jedel kómek kórsetetin QR-111 júıesi de keńinen qosylǵan, — dedi vıtse-mınıstr.
Sondaı-aq mınıstrlik ókili búginde barlyq óńirde Psıhologııalyq qoldaý ortalyqtary jumys istep turǵanyn tilge tıek etti. Onyń málimetinshe, bul ortalyqtarǵa 2025 jyly 28 myń bala júginse, 2026 jyldyń 1-toqsanynda 6 myńnan astam bala men 3,5 myńǵa jýyq ata-anaǵa kásibı deńgeıde kómek kórsetilgen.
Buǵan deıin Oqý-aǵartý mınıstrligi mekteptegi býllıngke qarsy jańa is-sharalar ázirlep jatqany jóninde jazdyq.
