Býllıngke tosqaýyl: jańa oqý jylynda qandaı qosymsha tetikter engiziledi
ASTANA. KAZINFORM — Oqý-aǵartý mınıstrligi aldaǵy oqý jylynda mekteptegi býllıngke qarsy ázirlengen jańa is-sharalarǵa qatysty túsinik berdi.
— 2030 jylǵa deıingi «Qazaqstan balalary» tujyrymdamasy qabyldanyp, balalarǵa kórsetiletin memlekettik qoldaý sharalary biryńǵaı júıege biriktirildi. Tujyrymdamany iske asyrý aıasynda 10 ındıkator jáne 158 is-shara qarastyrylǵan. 1 qyrkúıekten bastap 5–11-synyptarda balalardyń áleýmettik-emotsıonaldyq daǵdylaryn qalyptastyrýǵa, qaýip-qaterdi durys baǵalaýǵa jáne ómirlik turaqtylyǵyn damytýǵa baǵyttalǵan «Jeke qaýipsizdik» mindetti oqý kýrsy engiziledi, — delingen mınıstrliktiń Kazinform agenttigine bergen jaýabynda.
Sonymen qatar balalardyń psıhologııalyq jaǵdaıyn júıeli baqylaýǵa múmkindik beretin biryńǵaı tsıfrlyq memlekettik dıagnostıkalyq platforma engiziledi. Ulttyq bilim berý derekter qoryn jańǵyrtý aıasynda «Balalardyń psıhologııalyq ál-aýqaty» modýli iske qosylyp, balany úzdiksiz súıemeldeýge múmkindik beredi.
Munymen qosa, 2026 jyly elimizdiń barlyq óńirinde Balalardyń quqyqtaryn qorǵaý basqarmalary quryldy. Olar balaǵa qatysty quqyqqa qaıshy derekterdi erte anyqtaý, zorlyq-zombylyqtan zardap shekken balalardy súıemeldeý jáne Psıhologııalyq qoldaý kórsetý ortalyqtarynyń qyzmetin úılestirý jumystaryn atqarady.
Atap aıtqanda, bilim berý uıymdarynda «Pedagog-psıholog saǵatyn» engizý, oqýshylardy psıhologııalyq-pedagogıkalyq dıagnostıkalaýdyń biryńǵaı memlekettik júıesin iske qosý, sondaı-aq býllıng pen ózge de qaýip belgilerin anyqtaý úshin mektepterdiń beınebaqylaý júıelerine jasandy ıntellekt tehnologııalaryn kezeń-kezeńimen engizý josparlanǵan.
— Sonymen qatar 1 qyrkúıekten bastap «Jeke qaýipsizdik» sabaqtarynyń mazmuny jańartylyp, jańa ádistemelik materıaldar ázirlenedi. Erekshe nazar aýdarýdy qajet etetin balalardy «Adal azamat» baǵdarlamasynyń is-sharalaryna tolyq qamtý jáne profılaktıkalyq esepte turǵan jasóspirimder úshin tálimgerlik ınstıtýtyn damytý kózdelip otyr. Negizgi basymdyq — býllıng faktisi bolǵannan keıin ǵana áreket etý emes, táýekeldi erte anyqtaý, balany ýaqtyly súıemeldeý jáne mekteptegi qaýipsiz ortany júıeli túrde qamtamasyz etý, — dep atalyp ótken vedomstvo aqparatynda.
Aıta keteıik, Almaty mektepterinde byltyr býllıngke qatysty 600-den astam habarlama tirkelgen.
