Býllıngke qarsy kúres emes, aldyn alý mańyzdy – Oqý-aǵartý mınıstrligi

ASTANA. KAZINFORM – Eń bastysy – býllıng bolǵannan keıin onymen kúresý emes, ony boldyrmaý. Osylaısha balalarǵa qaýipsiz ári pozıtıvti orta qalyptastyrýǵa basymdyq beriledi. Bul týraly Oqý-aǵartý mınıstrligi Balalardyń quqyqtaryn qorǵaý komıtetiniń bas sarapshysy Albına Zalmuqanova Jibek Joly telearnasynyń «Búgin LIVE» baǵdarlamasynda aıtty.

Mamannyń aıtýynsha, elimizde býllıngtiń aldyn alý júıesi qalyptasyp, naqty tetikter engizilgen. Alǵash ret zańnamada «býllıng» uǵymy bekitilip, ákimshilik quqyq buzýshylyq kodeksine sáıkes býllıng úshin jaýapkershilik qarastyryldy.

– Bıyl otandyq sarapshylar ázirlegen «DOSBOLLIKE» baǵdarlamasy toǵyz óńirde pılottyq joba retinde iske asyryldy. Nátıjesinde baǵdarlama mektepter men kolledjderde engiziletin boldy. Dıagnostıka derekteri boıynsha, jábir kórsetýshi balalardyń úlesi 1,5 paıyzǵa, al ózin jábirleýshi retinde sezinetinderdiń úlesi 5,4 paıyzǵa azaıdy, – dedi A.Zalmuqanova.

Baǵdarlama aıasynda pán muǵalimderinen bastap kúzetshige deıingi barlyq qyzmetkerler qatysatyn antıbýllıngtik toptar qurylady. Bul toptar býllıngtiń aldyn alý, baqylaý jáne anyqtalǵan jaǵdaıda der kezinde kómek kórsetý jumystaryn atqarady.

- Pedagogtarǵa dıagnostıkalaý jáne naqty áreket etý algorıtmderi úıretiledi. Balanyń jas jáne psıhologııalyq erekshelikterin eskere otyryp, psıhologııalyq qoldaý ortalyqtarynyń mamandarymen birlesken ádistemeler ázirlenedi, – dedi maman.

Albına Zalmuqanovanyń aıtýynsha, «DOSBOLLIKE» jobasyn iske asyrýda Oqý-aǵartý mınıstrligine qarasty «Órken» ulttyq ǵylymı-praktıkalyq ınstıtýtynyń mamandary jyl boıy pedagogtardy oqytady.

Buǵan deıin, Qazaqstanda 1 qyrkúıekten bastap «DosbolLIKE» antıbýllıngtik baǵdarlamasy iske qosylatynyn jazǵan bolatynbyz.