Býllıng, jeńil tabys: vedomstvoaralyq mobıldi top 26 oqý ornyn aralady
ASTANA. KAZINFORM – «Zań men tártip» ıdeologemasyn iske asyrý aıasynda elordalyq prokýratýra men ákimdiktiń bastamasymen qaladaǵy bilim berý uıymdarynda 8–11 synyp oqýshylary men kolledj stýdentterine arnalǵan profılaktıkalyq dáris ótti.
Bir kún ishinde is-sharalar astananyń 13 mektebi men 13 kolledjinde uıymdastyrylyp, 3 myńnan astam bala men jasóspirim qamtyldy, dep jazdy elorda ákimdiginiń resmı saıty. Aýqymdy profılaktıkalyq jumys aldaǵy ýaqytta da jalǵasady.
Kezdesýler barysynda quqyqtyq saýattylyqty arttyrý, zorlyq-zombylyq pen býllıngtiń aldyn alý, jasóspirimder arasyndaǵy toptyq qaqtyǵystardyń aldyn alý máseleleri qaraldy. Sondaı-aq quqyqqa qarsy áreketter úshin jaýapkershilik jáne «jeńil tabys» dep atalatyn áreketterge tartylýdyń saldary jan-jaqty túsindirildi.
Quramyna prokýratýra, UQKD, PD, Bilim basqarmasy qyzmetkerleri men psıhologtar kirgen vedomstvoaralyq mobıldi toptar oqýshylarǵa shynaıy ómirde jáne ınternet keńistiginde qaýipsiz minez-qulyq qaǵıdalaryn túsindirdi. Kezdesýler barysynda quqyqbuzýshylyq, býllıng jáne kıberbýllıngtiń saldary týraly taqyryptyq beınerolıkter kórsetildi.
Kezdesý barysynda Esil aýdany prokýratýrasy bóliminiń prokýrory Erasyl Dosan qoldanystaǵy zańnamaǵa sáıkes qylmystyq jaýapkershilik 16 jastan bastalatynyn, al keıbir asa aýyr qylmystar úshin 14 jastan kózdeletinin atap ótti. Oqýshylar zańdy saqtaýǵa jáne árbir áreketine sanaly túrde qaraýǵa shaqyryldy.
Aıta keteıik, Astana qalasynyń Investıtsııalar jáne kásipkerlikti damytý basqarmasy, Baıqońyr aýdanynyń ákimdigi, sondaı-aq Polıtsııa departamenti men Tótenshe jaǵdaılar departamentiniń ókilderi «Alash», «Sharyn», «Ámir» jáne «Shanhaı» bazarlarynda túsindirý jumystaryn júrgizdi.