Býllıng, kıberbýllıng: 111 nómirine balalar kóbine qandaı máselelermen habarlasqan
ASTANA. KAZINFORM — «111» baılanys ortalyǵyna kómek surap habarlasqan balalardyń basym bóligi otbasylyq máseleleri boıynsha ótinish bergen. Bul týraly QR Oqý-aǵartý mınıstrligi Balalardyń quqyqtaryn qorǵaý komıteti tóraǵasynyń orynbasary málimdedi.
– Jyl basynan beri baılanys ortalyǵyna habarlasqan 111 myńǵa jýyq bala mektep pen kolledjderde bilim alady. Taldaý nátıjelerinde balalardyń jıi qoıatyn suraqtary – ata-analarymen qarym-qatynasyndaǵy qıyndyqtar, pedagogtermen aradaǵy máseleler, oǵan qosa mekteptegi býllıng, kıberbýllıng jaǵdaılary. Ata-anasy ajyrasyp jatqan balalar da jıi kómek surap habarlasady. Óıtkeni bul árbir balaǵa úlken soqqy, – deıdi Jomart Qarambaev Kazinform tilshisine bergen suhbatynda.
Eń kóp ótinish túsken óńirlerdiń úshtigin Almaty qalasy bastap tur. Onda 9 160 bala túrli shaǵymdarmen ortalyqtan kómek suraǵan. Batys Qazaqstan oblysynan 7 654 bala habarlassa, Túrkistan oblysynda turatyn 7 478 bala ortalyq járdemine júgingen.
– Batys Qazaqstandaǵy máselege kelsek, meniń oıymsha, bul mektep pen otbasydaǵy jaǵdaıǵa baılanysty. Mektepterde jumys jóndi jolǵa qoıylmaǵan dep oılaımyn. Qazir naqty sebebin anyqtaý úshin aýqymdy zertteý jasaýdy josparlap otyrmyz. Mektep otbasymen, ata-analarmen qalaı jumys istep jatqanyn da anyqtaýymyz kerek. Sodan keıin ǵana naqty sebebin bile alamyz. Tek BQO emes, Atyraý, Aqtóbe oblystaryn da qarasaq, olarda da osyndaı jaǵdaılar jıi kezdesetinin kórip otyrmyz. Sondyqtan osy batys óńirlerine jeke kóńil bólý kerek. Qazir olardyń basshylarymen de sóılesip, usynystar berip jatyrmyz, – deıdi mınıstrlik mamany.
«111» Respýblıkalyq baılanys ortalyǵynda tek psıhologııalyq emes, medıtsınalyq ta, zańgerlik te kómek kórsetiledi. Munda pedagogterden bólek polıtsııa qyzmetkerleri men densaýlyq saqtaý salasynyń mamandary qyzmet etedi.
– 110 myńnan astam baladan túsken ótinish arqyly taldaý jasaldy. Olardyń kóbine psıhologııalyq turǵydan qoldaý kórsetiledi. Naqty aıtsaq, 4 myńǵa jýyq bala psıhologııalyq kómek alǵan. 1 600-den astam ótinish boıynsha tıisti memlekettik organdarmen birlesip, balalarǵa naqty keshendi kómek kórsetildi, – deıdi spıker.
Aıta keteıik, bıyl 111 myńǵa jýyq bala kómek surap 111 baılanys ortalyǵyna júgingen.