Búlingen banknottardy qaıda aıyrbastaýǵa bolady
Asqat Muqamadıev aıtýynsha, Ulttyq bankiniń fılıaldaryna saraptamadan ótkizý úshin ártúrli banknottar túsip jatady, olar: tozǵan, kúıgen, jyrtylǵan aqshalar. «Bul banknottardyń barlyǵy fragmentteri boıynsha qaıta qurastyrylyp, qalpyna keltiriledi. Jyl basynan beri QUB jaramdylyǵy kúmán týdyratyn banknottar men monetalardyń 3 079-yn qabyldap, solardyń arasynan 2 542 banknotty aıyrbastap berdi. Olardyń kóbi jyrtylǵan, kúıgen, eskirip, jýylyp ketken», - deıdi basqarmasy bastyǵy.
Onyń aıtýynsha, eger banknottyń 50%-dan kóp bóligi jaqsy saqtalǵan bolsa, ony Ulttyq bank fılıaldaryna jaramdylyǵy jaǵynan kúmándi banknot retinde saraptamaǵa tapsyryp, shyn aqsha ekenin teksertýge bolady.
«Ol úshin banknottyń qalǵan bóligin uqyptap jınap alý kerek. Qandaı jaǵdaıǵa qaramastan, banknotty búlingen dúnıeniń ishinen, ámııannan, basqa da ydystan almaǵan durys. Áıtpese banknottar odan beter jyrtylyp, onyń shyn aqsha ekenin anyqtaý qıynǵa túsedi. Búlingen aqshany jumsaq zatqa orap, úlkendeý qorapqa salyp alý kerek. Osydan keıin ony saraptamadan ótkizý úshin Ulttyq banktiń aýmaqtyq fılıalyna ótkizesiz. Tekserýge bolatyn, aýmaǵy saqtalǵan búlingen banknottar jańa aqshaǵa aıyrbastalady. Alaıda, ony tekserý biraz ýaqyt alýy múmkin. Eń bastysy, saraptama tegin jasalady», - dedi ol.
Eger banknot óz kóleminiń keminde 70% saqtaǵan bolsa jáne onyń nomınalyn kórsetetin (jazbasha jáne san túrindegi) sandar qatty búlinbegen bolsa (eger banknottyń shyn aqsha ekenin rastaýǵa kedergi bolmasa), eskirgenine qaramastan, ol tólemge jaramdy aqshaǵa aıyrbastalady.
«Ondaı banknottardy ekinshi deńgeıli bankterge, QUB fılıaldaryna nemese «Qazposhta» AQ-na baryp, aıyrbastap alýǵa bolady.
Aıta keteıik, EDB ózderiniń ishki normatıvtik qujattaryna saı, qyzmet kórsetkeni úshin komıssııalyq tólem alýǵa quqyly.
Aýmaqtyq fılıaldardyń meken-jaıy men baılanys nómirleri Ulttyq bank saıtynda jazylǵan», - dedi Asqat Muqamadıev.