Búlikshiler shabýyldy aldyn ala syzylǵan jospar boıynsha júrgizgen – Bas prokýratýra

ASTANA. QazAqparat – Qańtar oqıǵasy kezinde búlikshiler shabýyldardy aldyn ala syzylǵan jospar boıynsha júrgizgen. Bul týraly Bas prokýratýranyń «Qańtar oqıǵasy: Derek pen dáıek» derekti fılminde baıandalǵan, dep habarlaıdy QazAqparat tilshisi.

«Almaty ákimdigine ot qoıar sáttegi myna kadrlarǵa nazar aýdarý kerek. Polıtsııa qyzmetkerleri beıbit kelssóz júrgizýge tyrysyp jatqanda, bir arandatýshy ortaǵa túsip, kópshilikti jappaı tártipsizdikke úndeıdi. Ákimdikti órtegen soń, búlikshiler irgedegi Prezıdent rezıdentsııasyna shabýyldaıdy. Bul sáttegi kadrlarǵa qarasaq, shabýyldyń aldyn ala syzylǵan jospar boıynsha júrgizilgeni anyq baıqalady. Aldymen temir qorshaýdy júk kóligimen soǵyp, sosyn ǵımaratqa qaraı bet alady. Qalqandarmen qorǵana otyryp, kúzetshilerge oq jaýdyrady», - delingen Bas prokýratýra usynǵan derekti fılmde.

Vedomstvo málimetine sáıkes, Qańtar kezinde 12 uıymdasqan qylmystyq top áreket etken. Olardyń ishindegi belsendileri «Aıshýaq-Jantúgel» jáne «Dıkıı Arman» toptary. Sońǵysy qalanyń ár jerinen 24 azamatty urlap, uryp-soǵyp «Qazaqstan» jáne «Ritz Carlton» qonaq úıleriniń parkınginde ustaǵan. Derekti fılmde atalǵan qylmystyq toptyq qolynda bolǵan azamat sol kezde kórgen qorlyǵyn kúızelispen eske aldy.

«Barlyǵymyzdy sol jerde óte qatty azǵyndyqpen ustady. Uryp-soǵyp, qan josa etip, tańerteń saǵat 11-ler shamasynda barlyǵymyzdy mal sııaqty júk kóligine tıedi. Ol konteınerde uryp-soǵyp, bir táýlik ustady», - dedi jábirlenýshi.

Vıdeodan alynǵan kadr