Bulanty shaıqasynyń 300 jyldyǵy respýblıkalyq deńgeıde atap ótilmek
ASTANA. KAZINFORM – Bulanty shaıqasynyń 300 jyldyǵy 2026-2028 jyldarǵa arnalǵan mereıtoılar men ataýly kúnder tizbesine engizildi. Bul týraly Májilis depýtattarynyń saýalyna Mádenıet jáne aqparat mınıstriniń mindetin atqarýshy Qanat Ysqaqovtyń jaýabynda aıtylǵan.
- Bulanty shaıqasy – Qazaq handyǵynyń Jońǵar shapqynshylyǵyna qarsy azattyq kúresindegi alǵashqy iri jeńis jáne keıingi Ańyraqaı shaıqasyndaǵy jeńiske jol ashqan mańyzdy tarıhı oqıǵa. Shaıqas nátıjesinde qazaq jeriniń bir bóligi azat etilip, eldiń birligi men myzǵymas tutastyǵy, kúsh-qaıraty odan ármen shyńdala tústi. Zertteý nátıjesinde, sondaı-aq Bulanty shaıqasy boıynsha búgingi kúnge deıin aýyzdan-aýyzǵa jetken folklorlyq, arheologııalyq jáne toponımıkalyq derekterge súıene otyryp, Ulytaý óńirindegi Bulanty jáne Bileýti ózenderiniń aralyǵy shaıqas orny retinde aıqyndaldy, - dedi ol.
Vıtse-mınıstr Bulanty shaıqasyna qatysty derekterdiń áli de sırek ekenin eskere otyryp, onyń tarıhtaǵy ornyn aıqyndaý maqsatynda qosymsha zertteýler júrgizý, arhıvtik derekterdi izdestirý jáne shaıqas ornyn naqtylaýdyń mańyzy erekshe ekendigin atap ótedi.
- Osy oraıda, Ulytaý oblysy ákimdiginiń usynysyna sáıkes, Mádenıet jáne aqparat mınıstrimen 2025 jylǵy 1 tamyzda bekitken 2026-2028 jyldarǵa arnalǵan mereıtoılar men ataýly kúnder tizbesine 2027 jyly Bulanty shaıqasynyń 300 jyldyǵy engizilgenin habarlaımyz. Ulytaý oblysynyń ákimdigi atalǵan mereıtoıdy atap ótý aıasynda tarıhı tanymdyq ekspedıtsııalar, ǵylymı konferentsııalar ótkizý sııaqty is-sharalardy uıymdastyrý jáne Bulanty keshenin abattandyrý máselelerin qarastyrýda. Jalpy, mereıtoı aıasynda ótkizý kózdelip otyrǵan ǵylymı konferentsııany Ǵylym jáne joǵary bilim mınıstrliginiń Sh.Ýálıhanov atyndaǵy Tarıh jáne etnologııa ınstıtýty ǵalymdarynyń áleýetin paıdalana otyryp ótkizý tıimdi, - dedi Qanat Ysqaqov.
Onyń aıtýynsha, respýblıkalyq mýzeıler men mýzeı-qoryqtardyń áleýetin paıdalana otyryp, tıisti sharalardy uıymdastyrý máselesi de nazardan tys qalmaıdy.
- Bulanty shaıqasy – Qazaqstannyń táýelsizdik jolyndaǵy kúresiniń jáne ulttyq birliginiń sımvoly, patrıottyq tárbıe men tarıhı sanany qalyptastyrýdaǵy mańyzdy mura. Baıandalǵandardyń negizinde, 2027 jyly Bulanty shaıqasynyń 300 jyldyǵyn atap ótýge arnalǵan jumys josparyn ázirleý máselesi múddeli memlekettik organdar belgilengen tártipke sáıkes pysyqtap, bólingen qarajat sheńberinde júzege asyrylatynyn jetkizemiz, - dedi vıtse-mınıstr.
Aıta keteıik, Qazaqstan tarıhynyń jeti tomdyǵy negizinde mektepke arnalǵan oqý baǵdarlamasy jasalady.