Bulan men elik toq: «Ertis ormanynda» azyq oryndary uıymdastyrylyp jatyr
Pavlodardaǵy jalqaraǵaı ormandarynda tuıaqty janýarlar úshin arnaıy azyq oryndary bar. Ańshylyqtanýshy mamandar men ınspektorlar kún saıyn ottyqtarǵa butaq býmalaryn ilip, jem-shóp shashady. Jabaıy janýarlar ydystaǵy tuzdy jalap, jasandy sý qoımalarynan meıirleri qanǵansha sý ishedi, dep habarlaıdy Kazinform.
Jer betin aq mamyq kórpe japqan mezgilde de «Ertis ormany» memlekettik orman tabıǵı rezervatynda qaýyrt jumys tynshymaıdy. Qys qaharyna minip, omby qar túskende Shaldaı jáne Besqaraǵaı fılıaldaryndaǵy qyzmetkerler janýarlar álemin brakonerlerden qorǵaý, jabaıy ańdardy tirkeý men olardyń kóship-qoný monıtorıngin júrgizedi. Bul ýaqytta tuıaqty janýarlar úshin qar astynan azyq taýyp jeý qıynǵa soǵatyny málim. Osyny eskergen jergilikti ańshylyqtanýshy mamandar orman arasyn mekendeıtin bulan, elik sııaqty sútqorektilerge azyq oryndaryn uıymdastyrady.
- Ormanshylar tilinde bul bıotehnıkalyq is-shara dep atalady. Bıyl orman janýarlary úshin bizdiń rezervattyń qyzmetkerleri aǵash butaqtarynyń 2000 dana býmasyn, 50 tsentner shóp, 2000 kılogramnan astam azyqtyq tuz daıyndap qoıdy. Rezervat aýmaǵynda 63 dana ottyq, 63 dana tuz jalaqtar, 63 azyqtandyrý alańdary, 70 jasandy sýattar, janýarlar álemin qorǵaý taqyrybynda 30 anshlag ornatylǵan,-deıdi «Ertis ormany» rezervatynyń baspasóz qyzmetkeri Araı Atyǵaeva.
Aıtyp óteıik, orman qorǵaý mekemesiniń negizgi mindetine tek jalǵaqaraǵaı ormandaryn qorǵaý ǵana emes, ondaǵy ózge ósimdik túrleri men janýarlar álemin saqtaý da kiredi. 2003 jyly rezervat aýmaǵynda ósimdikterdiń 84 túri tirkelse, ǵylymı zertteý jumystarynyń nátıjesinde floranyń alýandyǵy keńeıip, byltyrǵa deıin 226 túri anyqtalypty. «Qyzyl kitapqa» engizilgen janýarlar men qustardyń 7 túri, túrli tuıaqty ań bar.
Mekeme ańshylyqtanýshysy Marat Amanovtyń aıtýynsha, 16 orman sharýashylyǵynyń árqaısynda bir ańshylyqtanýshydan bar. Jaz boıy ormanshylardyń kómegimen tuıaqty ańdarǵa qysqy azyqtar daıyndalady.
«Bıylǵa jalpy salmaǵy 50 tonnadaı azyǵymyz daıyn tur. Kóbine qaıyń men kókterektiń butaqtarynan býylǵan sypyrǵylardyń molynan daıyndalýyna kóńil bólemiz. Sebebi bulan men elik atalǵan aǵashtardyń japyraqtarymen, usaq butaqtarymen azyqtanǵandy unatady. Olardy mezgil saıyn arnaıy ottyqtarǵa aparyp ilip qoıamyz. Janýarlar ottyqqa deıin jeńil jetýi úshin aǵashtar arasyn traktormen kúrep, jol da jasap qoıdyq. Sońǵy esebimiz boıynsha Shaldaı ormandarynda 193 bulan men 720 elik bar. Tuıaqty janýarlar kóbine ormannyń alańshyqtaryn mekendeıdi. Qysqy is-sharalarǵa orman ınspektorlary da atsalysady» deıdi ańshylyqtanýshy.
Rezervat aýmaǵynda búginde ań aýlaýdyń barlyq túrine tyıym salynǵan.
