Bul jupty bólek elestetý múmkin emes: Shymkenttik qyz ben jylannyń dostyǵy týraly
ASTANA. QazAqparat - 14 jasar shymkenttik Aızada Ábdibek salmaǵy 15 kılogramdyq alyp jylandy emin-erkin aýzyna salyp, bıleı alady. Dál osy erekshe qabiletimen kózge túsken jas ónerpazǵa Reseı, Ózbekstan, Qytaı, Túrikmenstan tsırkinen shaqyrtý túsip otyr. Alaıda qazaqtyń tsırk ónerin damytýdy kózdeıtin qarshadaı qyz óz elinde de bıik shyńdy baǵyndyrýdy kózdeıdi.
Týǵaly ákesi Ábdimútáli men anasy Kámshattyń túrli jyrtqysh jan-janýarlardy, onyń ishinde adýyndy da aıbarly aıýlardy baptaǵanyn kórip ósken Aızada otbasylyq ıgi dástúrdi jalǵastyryp, dáripteýde. Kishkene kúninen osyndaı jyrtqyshtarǵa etene bolyp ósken ol tsırk ónerinde qolǵa úırenýi ońaı aıýdy emes, odan da qıyn da kúrdeli jylanmen jumys jasaýdy tańdaǵan. Eń alǵash 5 jasynda «Kesha» esimdi jylanymen manejge shyǵyp, túrli gımnastıkalyq is-qımyldar jasaǵan. Sol kezden bastap, kúni búginge deıin súıikti janýarynan bir eli ajyramaı, kórermen kózaıymyna aınalýda.
«Kesha men Aızada tabıǵat ananyń eki bólek jaratylysy. Deıturǵanmen olardyń arasyndaǵy tylsym bir energetıka, aıryqsha mahabbat bary kórermenge birden seziledi. Árdaıym tek birge óner kórsetetin bul jupty eki bólek elestetý de múmkin emes», - deıdi Aızadanyń anasy. Tipti, Kesha ıesin ózge de tsırk ártisterinen qyzǵanatyn sátteri bolady eken.
Jeti jasar sary albınos tuqymynan taraıtyn Kesha Aızadaǵa baýyr basqany sonshalyq, ekeýi birge bir bólmede uıyqtaı beredi. Bala kezinen úıinde maımyl, aıý kórip ósken Aızadaǵa árıne bul qorqynyshty emes.
Aızada Ábdibek - negizinen áýe gımnastıkasymen aınalysady. Onyń tsırktegi basty qyzmeti de osy. Ata-anasy qyzdarynyń dál osy baǵytqa degen erekshe qyzyǵýshylyǵy men qarym-qabiletin baıqap, Tashkent tsırkiniń tanymal ártisi Kamıla Hametovadan arnaıy bata alyp, onyń bir quralyn yrymdap suratyp ta alǵan. Yrymshyl qazaqtyń aq tilegi aıqyn maqsatqa aınalyp keledi. Sebebi, búgingi tańda Qazaqstanda áýede erkin qalyqtap óner kórsetetin saýsaqpen sanarlyq ártisterdiń eń jasy Aızada. Ol osy jolda ózindik qoltańbalary bar, tanymal tsırk juldyzdary Ázilbek Bolatov pen erli-zaıypty Jumat, Qorlan Janmurzaevtardan da sabaq alǵan.
Áýe gımnastıkasymen qatar, bir ǵana jylanymen shektelip qalmaı, túıe, qoltyraýynmen de óner kórsetedi. Bala turmaq, úlkender júreksinetin bir tonnalyq qoltyraýynnyń qoltyǵyna kirip, aýzynan shyǵatyn jas ónerpazdyń boıynda erekshe daryn men qabilet bar. Mamandar áýede erkin qalyqtap, jerde eń jyrtqysh sanalatyn jan-janýarlarmen tez til tabysatyn balanyń bolashaǵy zor degendi aıtady. Ol óz aldyna - qazaq tsırk ónerin álemdik arenada tanytýdy da maqsat etip qoıǵan.
Aldaǵy ýaqytta, jas ónerpaz túıe men jylandy sabaqtastyra úzdik bir nómir ázirlep elimizdiń barlyq aımaqtaryn gastroldik saparmen aralap qaıtpaq nıette eken. Ekiniń biri tańdaı bermeıtin erekshe mamandyqty aıryqsha ónerimen ushtastyryp júrgen jas ónerpazǵa jan-jaqty qoldaý qajet. Óıtkeni, Aızadaǵa qazirdiń ózinde ózge elden qol sozyp, kóz tastap júrgender kóp eken.
Foto: kaztrk.kz
