Bul jolǵy raqymshylyq «1953 jyldyń sýyq jazyn» qaıtalamaı ma

ASTANA. KAZINFORM – Májilis depýtaty Abzal Quspan raqymshylyq týraly zań jobasyna baılanysty jýrnalısterdiń suraǵyna jaýap bergen. BAQ ókili Stalın óliminen keıin jasalǵan 1953 jylǵy raqymshylyqtyń saldaryn eske alyp, Qazaqstanda mundaı stsenarıdiń qaıtalanýy qanshalyqty múmkin ekenin surady.

Depýtattyń aıtýynsha, bul oqıǵa zań salasy boıynsha búkil oqý ornynda erekshe keıs retinde oqytylady. Sondyqtan raqymshylyq týraly qandaı da bir sheshim qabyldar kezde mindetti túrde eskeriledi. 

- Jańa zań boıynsha raqymshylyqqa 40 myń adamnyń 15 myńy iligýi múmkin, ıaǵnı sottalǵandardyń árbir úshinshisi degen sóz. Biraq 15 myń adamnyń ishinde tek 4,1 myńyn bosatý kózdelgen. Olardyń kópshiligi - probatsııalyq baqylaýda turǵandar. Al bosatylatyndardyń sany – 630 adamnyń tóńireginde. Oǵan qosa, túrmede jazasyn tolyq óteýge bir jyl ǵana qalǵan 1 700 adam da bostandyqqa shyǵady, - dedi ol.

Sondaı-aq depýtat bul 2 myńnan astam adam bostandyqqa shyqqan kúnniń ózinde qatań probatsııalyq baqylaýda bolatynyn aıtty.

- Osy kúnge deıingi tájirıbe kórsetip otyrǵandaı, bul - táýelsizdik tarıhyndaǵy onynshy raqymshylyq aktsııasy. Raqymshylyqqa iligip shyqqandardyń ishinde qylmystyń qaıtalanýy joq deýge bolady, – dedi Abzal Quspan.

Aıta keteıik, Keńes zamanyndaǵy sóz bolǵan kezeń týraly «1953 jyldyń sýyq jazy» deıtin fılm bar. 

Búgin Májilis Konstıtýtsııanyń 30 jyldyǵyna oraı jasalatyn raqymshylyq týraly zańdy qabyldady.