Bul jyl sizderge arnaldy: Prezıdent Halyqaralyq eriktiler jylymen quttyqtady
ASTANA. KAZINFORM – 2026 jyldy Halyqaralyq eriktiler jyly dep jarııalaý bastamasyn Qazaqstan kóterip, ony BUU-ǵa múshe memleketter qoldady. Bul týraly Memleket basshysy Qasym-Jomart Toqaev «Taza Qazaqstan» aktsııasyna qatysqan jastarmen kezdesýde aıtty.
– Cizder – jas, jigerli azamatsyzdar. Volonterlik qyzmetpen aınalysyp júrsizder. Óte durys. Men eriktilerdiń eńbegin qoldaımyn. Bul – elge shynaıy janashyr bolýdyń naqty kórinisi, – dedi Qasym-Jomart Toqaev Prezıdent saıabaǵynda ótken «Taza Qazaqstan» ekologııalyq aktsııasynda.
Memleket basshysy 2020 jyl Volonter jyly retinde atalyp ótkenin eske saldy. Sondaı-aq Birikken Ulttar Uıymynda sóılegen sózinde ol Halyqaralyq volonterler jylyn belgileý týraly bastama kóterdi.
– Bul usynysymdy álem elderiniń barlyǵy derlik qoldap, 2026 jyl Halyqaralyq volonterler jyly bolyp jarııalandy. Bul jyl sizderge arnaldy. Budan bólek, Qazaqstan – volonterlik qyzmetti eń joǵary zań deńgeıinde, ıaǵnı Konstıtýtsııada bekitken sanaýly memleketterdiń biri. Osy oraıda, elimizdegi jáne sheteldegi barsha eriktilerdi shyn júrekten quttyqtaımyn!, – dedi Q. Toqaev.
Byltyr Prezıdent BUU minberinen elimizde «Taza Qazaqstan» biregeı jobasy tabysty júzege asyrylyp jatqanyn aıtqan edi.
– Sonyń negizinde BUU Bas Assambleıasynyń 80-sessııasynda 22 sáýirdi «Halyqaralyq jer sharyn kógaldandyrý kúni» dep jarııalaýdy usyndym. Bul bastamany da BUU Bas Assambleıasynyń barlyq múshesi túgel qoldady deýge bolady. Munyń bári Qazaqstannyń dúnıe júzindegi ozyq úrdisterdi tereń túsinip, zaman talabyna saı damyp kele jatqanyn kórsetedi. Osylaısha, elimiz álemdegi beıbitshilikti saqtaýǵa óziniń eleýli úlesin qosyp otyr. Elimizdiń bolashaǵy – sizder sııaqty bilimdi, belsendi, kózi ashyq, kókiregi oıaý, talapty jastardyń qolynda! Joldaryńyz árdaıym ashyq bolsyn!, – dedi Memleket basshysy.
Aıta keteıik, Memleket basshysy Qasym-Jomart Toqaev «Taza Qazaqstan» ekologııalyq aktsııasyna qatysty jáne jas ekobelsendilermen birge Prezıdent saıabaǵy aýmaǵynda aǵash ekti.
Jyl basynan beri «Taza Qazaqstan» aktsııasyna 7 mln adam qatysyp, 130 myń gektar jer tazartylǵan.
