Bul Jeńis búkil soǵysqa qatysýshylar men tyl eńbekkerleriniń qajymas qaıraty men qaısar rýhynyń jeńisi - Ahmetjan Esimov
Bul búgingi táýelsiz eldiń jas ulandaryna amanat etetin ıgilikti dástúr bolýy tıis. Qala ákimi Ahmetjan Esimov búgin Almatydaǵy 28 panfılovshylar saıabaǵyndaǵy máńgilik alaýǵa gúl shoǵyn qoıý kezinde osylaı aıtty, dep habarlaıdy QazAqparat.
"Bul Jeńis búkil soǵysqa qatysýshylar men tyl eńbekkerleriniń qajymas qaıraty men qaısar rýhynyń jeńisi.Eldiń eldigi, erdiń erligi synǵa túsken, Otan úshin ot keshken aýyr kúnderdiń, qaharmandyqtyń belgisi. Sondyqtan da búgin - el namysy úshin erlikpen qaza tapqan bozdaqtardyń rýhyna taǵzym etip, aramyzda júrgen ardagerlerimizge qoshemet kórsetetin erekshe kún. Uly Otan soǵysynyń surapyl jyldarynda ár 4-shi sarbazyn maıdanǵa attandyryp, jaýyngerlerdi barlyq kerek qarý-jaraqpen qamtamasyz etken Qazaqstan úshin bul soǵys qasıetti de qasterli soǵys boldy. Soǵys bizdi tek erlikke ǵana úndep qoıǵan joq, ortaq Otan úshin, el men jer úshin, tastúıin bolyp birige bilýge de úıretti", deıdi Ahmetjan Smaǵululy. Qala basshysynyń aıtýynsha, qasıetti Jeńistiń eń basty qozǵaýshy kúshi, altyn arqaýy bizdiń yntymaqtastyǵymyz ben dostyǵymyzda, baýyrlastyǵymyz ben týysqandyǵymyzda bolǵandyǵyn biz máńgilikke túsindik. Bizdiń ardager atalarymyz ben apalaramyzdy bir uly maqsat, bir múdde biriktirdi. Ol Otanǵa degen sheksiz súıispenshilik bolatyn. Olar erlikti de, eńbekti de Otan úshin dep jasady.
"Elbasymyz Nursultan Nazarbaev atap ótkendeı, qazaqstandyqtar Jeńis kúnin aǵa urpaqtyń otanymyzǵa degen sheksiz súıispenshiliginiń úlgisindeı árqashan este tutady. Táýelsiz memleketimiz úlken tarıhı kezeńderdi bastan ótkerip búgingideı gúldenip, ósip-órkendeýine osy ortamyzda turǵan ardagerlerimizdiń sińirgen eńbeginiń ólsheýsiz ekenin bárimiz de jaqsy bilemiz", deıdi Ahmetjan Esimov.
