Bul jeńis bizdegi fýtboldyń damý dárejesin baıqatty - QFF prezıdenti Á. Jaqsybekov
ASTANA. 21 tamyz. QazAqparat - Qazaqstan Fýtbol federatsııasy prezıdenti Ádilbek Jaqsybekov «Shahter» men «Seltık» arasyndaǵy kezdesýden soń qazaqstandyq komandany jeńisimen quttyqtady dep habarlaıdy vesti.kz.
«Biz bárimiz bul jeńisti kúttik, bizge jeńis aýadaı qajet edi. Bul bizdiń fýtboldyń damý úrdisin dáleldeıdi. «Shahter» «Seltık» sııaqty komandany tize búktirdi. Sizderge «Seltıktiń» kim ekendigin aıtyp túsindirmeı-aq qoıaıyn», - dedi ol.
«Biz Azııaǵa aýysar edik, biraq Chempıondar lıgasy Azııada joq, Eýropa lıgasy da joq. Sondyqtan «Seltık» syndy komandalar bizge kelmes edi. Árıne, bul jerde jeńister úlken eńbekpen keledi. Sizderden qoldaý kórsetýlerińizdi suraımyn. Syn aıtýǵa da bolady, árıne, biraq qoldaǵan da durys», - dep ol komandanyń deńgeıin baǵalap ótti.
Sonymen qatar «Shahterdi» jeńisimen quttyqtaýǵa Qazaqstan shaıbaly hokkeı federatsııasynyń prezıdenti Asqar Mamın da keldi, ol bul oıyndy ózi kelip tamashalady. «Shahter» jeńisinen jaqsy áserdemin. Eýropa fýtbolynyń alyp komandalarynyń birin tize búktirdik. Bul - qazaqstandyq sporttyń úlken jetistikteriniń biri. Dál osy oıynda birneshe jyl boıǵy tókken terimiz nátıjesin berdi» - dedi A. Mamın.
Onyń sózine qaraǵanda, komandanyń oıyny óz deńgeıinde ótti.
«Shynymen de, komandanyń oıyny oıdaǵydaı ótti. Birneshe kezeń boıy «Shahter» turaqty joǵary kórsetkishpen kózge túsip keldi. Jaýapty oıynda komandamyz týra osyndaı nátıjemen tıisti deńgeıde oınap, toptyq jarysqa qatysýǵa múmkindik alsyn dep tileımin», - dedi Asqar Mamın.
Londonda júrgen eki dúrkin Olımpıada chempıony Ilıa Ilın «Shahterdi» jeńisimen óziniń tvıtterdegi paraqshasynda quttyqtady.
«Jeńis qutty bolsyn! «Shahter» fýtbol komandasynyń oıynshylary jarady! Senderge tabys pen jeńister tileımin! Alǵa, Qazaqstan!» - dep jazylǵan tvıtterde.
2013 jylǵy mánerlep syrǵanaýdan álem chempıonatynyń kúmis júldegeri Denıs Ten qazaqstandyqtardy «Shahterdiń» jeńisimen quttyqtady.
«Barlyq qazaqstandyqtardy «Shahterdiń» jeńiske jetýimen quttyqtaımyn! Tarıhı match! Jaraısyńdar!» - dep jazdy tvıtterdegi paraqshasynda qazaqstandyq mánerlep syrǵanaýshy D. Ten.
