Bul jańa vırýs emes: Densaýlyq saqtaý mınıstrligi jıi tumaýratýdyń sebebin túsindirdi
ASTANA. KAZINFORM – Elimizde jańa tumaý shtamy tarap jatqan joq, epıdemıologııalyq jaǵdaı turaqty. Bul týraly QR Densaýlyq saqtaý mınıstrliginiń resmı ókili Ásel Qydyrálıeva habarlady.
Maman adamdardyń jıi naýqastanýyn maýsymmen baılanystyrdy.
– Ótpeli maýsymda vırýstyq ınfektsııa jıileıdi. Qazaqstanda tumaý jyl saıyn qarasha aıynan bastalyp, sáýir aıynyń ortasyna deıin sozylady. Qazir maýsymdyq A tumaýy tarap jatyr. Degenmen, bıyl jedel respıratorlyq vırýstyq aýrýlar deńgeıi ótken jylmen salystyrǵanda artqan joq, – dedi Ásel Qydyrálıeva Jibek Joly arnasynyń «Búgin LIVE» baǵdarlamasynda.
Alaıda keıbir óńirlerdegi balalar men eresekterge arnalǵan ınfektsııalyq statsıonarlarda naýqastar sany ýaqytsha kóbeıýi múmkin.
– Bir mezette kóp adamnyń medıtsınalyq kómekke júginýi – qalypty qubylys. Іri qalalarda osyndaı kórinis baıqalatyny ras. Bıyl 1 mln 279 myńǵa jýyq jedel respıratorlyq vırýs jaǵdaıy tirkelgen, olardyń jartysynan kóbi 14 jasqa deıingi balalar. Ótken jylmen salystyrǵanda syrqattanýshylyq 19%-ǵa tómen, – dedi maman.
DSM ókiliniń aıtýynsha, A tumaýy – jańa vırýs emes, burynnan belgili maýsymdyq tumaýdyń bir túri. Degenmen, ol halyqtyń álsiz toptary úshin qaýipti sanalady.
– Qaýip tobyna balalar, júkti áıelder jáne qant dıabeti, júrek-qan tamyrlary, tynys alý joldarynyń aýrýlary bar adamdar kiredi. Mundaı kezde profılaktıka júrgizý óte mańyzdy, – dedi maman.
Ásel Qydyrálıevanyń sózinshe, vırýstyń taralýy jyldam júredi. Belgileri – joǵary temperatýra, qurǵaq jótel, álsizdik pen bas aýrýy. Olar tumaý juqtyrǵannan keıin 1-2 kún ishinde bilinýi múmkin.
– Basty qorǵanys sharalarynyń biri – vaktsınatsııa. Elde 2 mıllıonnan astam doza dári satyp alynǵan, kez kelgen adam ekpe ala alady, – dedi maman.
Alaıda DSM ókili ekpe aýrýdan qorǵaıtyn jalǵyz amal emes ekenin aıtty.
– Birinshiden, uıqy men demalys mańyzdy. Uıqynyń jetispeýi jáne únemi sharshap júrý ımmýnıtetti álsiretedi, eshqandaı dárýmen bul tapshylyqty óteı almaıdy. Ekinshiden, durys tamaqtaný qajet. Aǵzaǵa jetkilikti mólsherde aqýyz túsý kerek. Úshinshiden, jyly ári ylǵaldy orta mańyzdy. Qurǵaq aýa tynys joldarynyń shyryshty qabatyn qurǵatýy múmkin, al ol sýyq tııý men vırýstan qorǵaıtyn alǵashqy qalqan. Úıdi jıi jeldetip, shóp shaıyn iship júrý ımmýnıtetti kúsheıtedi, – dedi maman.
Buǵan deıin elordadaǵy emhanalarda «fıltr-kabınet» jumys isteıtinin jazǵan bolatynbyz.