Bul toı sanaly ǵumyryn týǵan eliniń ádebıeti men ǵylymyn damytýǵa arnaǵan jazýshynyń ǵana emes, barsha halyqtyń ortaq merekesi
ALMATY. 10 qyrkúıek. QazAqparat - Ádı Sháripov óz bastamasymen Almaty demalys-saýyqtyrý ǵımaratyn, Qazaqstan jazýshylarynyń shyǵarmashylyq úıin, qalalyq oqýshylar úıin jáne basqa da mádenı-áleýmettik nysandardy saldyrdy.
Ony qala ákiminiń orynbasary Serik Seıdýmanov búgin Almatyda partızan-jazýshy Ádı Sháripovtyń 100 jyldyǵyna arnalǵan saltanatty keshte aıtty.
«Ádı Sháripov kózi tirisinde-aq aty ańyzǵa aınalǵan tulǵa. Aqıyq aqyn Tumanbaı Moldaǵalıev aǵamyz arnaý óleńinde: «Mynaý dúnıede aǵataı óziń jaıly ańyz kóp», - dep tegin aıtpasa kerek. Abaı, Muhtar, Shákárim syndy ataqty tulǵalar ómirge kelgen Semeı topyraǵynda dúnıege kelgen Ádı Sháripov Almatyda turyp, úlken shyǵarmashylyq bıikterge jetkenin biz úlken maqtanysh tutamyz. Sondyqtan Almaty qalasy ákimshiliginiń qoldaýymen ótip jatqan búgingi óner keshi talantqa taǵzym dep bilemin», - dedi qala ákiminiń orynbasary Serik Seıdýmanov. Onyń aıtýynsha, Ádı Sháripov Semeıdegi medıtsınalyq, Oraldaǵy aýylsharýashylyq, Qaraǵandydaǵy saýda kooperatıv ınstıtýttarynyń ashylýyna tikeleı qamqorlyq jasady. Óziniń qajymas kúsh-qaıraty men shyǵarmashylyq eńbeginiń arqasynda eli men áriptesteriniń úlken qurmetine bólendi. Qoǵam men memleket aldyndaǵy aıryqsha eńbegi úshin kóptegen orden-medaldarmen marapattaldy. Búginde Almatynyń ortalyǵyndaǵy bir kóshe men qazaq orta mektebi Ádı Sháripovtyń esimimen atalady.
