Bul tek qana jańa jobanyń dúnıege kelýi emes, bul úlken saıası, tárbıelik máni bar oqıǵa - M.Áshimbaev
STANA. Qyrkúıektiń 24-i. QazAqparat /Marlan Jıembaı/ - Bul tek qana jańa jobanyń dúnıege kelýi emes, bul úlken saıası, tárbıelik máni bar oqıǵa. Bul pikirdi búgin el tarıhynda tuńǵysh ret taza qazaq tilinde habar taratatyn «Balapan» telearnasynyń iske qosylýynda sóz sóılegen QR Prezıdenti Ákimshiligi basshysynyń orynbasary Máýlen Áshimbaev bildirdi.
Ótken jyly Elbasy N.Nazarbaev Aqparat mınıstrliginiń, Prezıdent Ákimshiliginiń aldyna 100 paıyz qazaq tilinde habar taratatyn 3 telearna qurý týrasynda tapsyrma bergendigin atap ótken ol «Memleket basshysynyń tapsyrmasyn oryndap, balalar telearnanyń tusaýkeserine jınalyp otyrmyz. «Balapan» telearnasy buıyrtsa, bolashaǵy úlken, biraz kórermeni bar, jaqsy-jaqsy habarlar taratatyn telearna bolady. Osy telearnanyń ashylýy úlken oqıǵa. Bul tek qana jańa jobanyń dúnıege kelýi emes, bul úlken saıası, tárbıelik máni bar oqıǵa», dedi.
M.Áshimbaev sońǵy jyldary qazaq tiliniń mártebesin kóterý, qazaq tilin qoǵamymyzda keńirek taratý baǵytynda birqatar jumystar atqarylyp jatqandyǵyn basa aıtyp, basqa ult ókilderine de memlekettik tildi úıretýge arnalǵan biraz baǵdarlamalardyń bar ekendigin tilge tıek etti. Sonymen qatar jańadan shańyraq kóterip otyrǵan «Balapan» telearnasynyń tárbıelik, tanymdyq mańyzy bolatyndyǵyna da senim bildirdi.
Bul oraıda kóp nárse balalyq kezden bastalatyndyǵyna basa nazar aýdarǵan ol «balalardy jaqsylap qazaq tiline úıretsek, tap-taza qazaqsha sóılep tursa, árıne, bul bizdiń tilimizdiń bolashaǵyna úlken jol ashatyny sózsiz. Sondyqtan osy «Balapan» telearnasy qazaq tilin taratýda, qazaq tilin basqa ult ókilderine úıretýde úlken ról atqaratynyna bárimiz senemiz», dep túıindedi sózin.
