Bul - sportshylardyń ǵana emes, búkil qazaq halqynyń jeńisi - aralas jekpe-jekten álemniń 3 dúrkin chempıony A. Nazarov
ALMATY. Qazannyń 26-sy. QazAqparat /Erlik Erjanuly/ - Begnar Amanbaevtyń reıtıngi Álem chempıondyǵy úshin jekpe-jek ótkizýge múmkindik beredi.
Ony aralas jekpe-jekten álemniń 3 dúrkin chempıony Ardaq Nazarov Almatyda Respýblıka kúnine oraı uıymdastyrylǵan halyqaralyq kásipqoı boks jáne aralas jekpe-jek týrnırinde aıtty, dep habarlaıdy QazAqparat.
Begnar Amanbaev djıý-djıtsýdan Qazaqstannyń 2 dúrkin chempıony, al erejesiz jekpe-jekten Eýrazııa chempıony. Sáýirdiń 26-sy kúni Almatyda ótken týrnırde reseılik Vaha Alıevti jeńip, aralas jekpe-jekten TMD chempıony ataǵyna qol jetkizgen 27 jastaǵy sportshy Qazaqtyń ulttyq týrızm jáne sport akademııasynda oqıdy. Bul joly reıtıngtik jekpe-jekte ol 60 keli salmaqta erkin kúresten Reseı chempıony Mýnko Norsonovty 1-shi raýndta qol buraý tásilimen jeńdi. Onyń jeńisti jolyn odan keıin komandalas serikteri odan ary jalǵastyrdy. Erbol Orazǵalıev (70 keli) Reseılik Dmıtrıı Sevakovty moıyn buraý tásilimen, al Saıaýysh Qasabaev (80 keli) Vıtalıı Kýlıshovty eseńgiretý arqyly 19-shy sekýndta-aq tize búktirdi.
"Bul - qazaq jigitteriniń aralas jekpe-jektegi joǵary deńgeıin kórsetetin jaqsy kórsetkish. Ol ár sportshynyń ǵana emes, búkil qazaq halqynyń ortaq jeńisi. Begnar Amanbaevtyń reıtıngi qazir álem chempıondyǵy úshin talasýǵa múmkindik beredi. Qudaı qalasa, endi ony júzege asyrý úshin bar kúsh-jigerimizdi jumsaıtyn bolamyz", deıdi erejesiz jekpe-jekten álemniń 3 dúrkin chempıony Ardaq Nazarov.
