Bul shynymen de elimizdiń tarıhı sahnasy - Respýblıka saraıyndaǵy kontsert
LMATY. Mamyrdyń 25-i. QazAqparat /Názıra Eleýhan/ - Almatyda qalamyzdyń bas sahnasy sanalatyn Respýblıka saraıynyń kúrdeli jóndeý jumystary aldynda qazaqstandyq óner sheberleriniń qoshtasý kontserti ótti,
dep habarlaıdy QazAqparat.
Kontsertte Eskendir Hasanǵalıev, Sara Tynyshtyǵulova, Roza Rymbaeva, Lakı Kesoglý, Maqpal Júnisova, Sembek Jumaǵalıev, Asylbek Eńsepov, «Dos Muqasan», «Ulytaý», «Orda» toptary jáne taǵy da basqa estrada juldyzdary kóp jyldar boıy halyqtyń kóńilinen shyǵyp kele jatqan úzdik ánderin oryndady. Barlyq ánshilerge bas sahna men mádenıetimizge sińirgen eńbekteri úshin ataýly syılyqtar tabystaldy. Keshtiń qadirli qonaqtary retinde kontsertke Ermek Serkebaev pen Bıbigúl Tólegenova qatysty.
Respýblıka saraıyna 40 jyl boıy jóndeý jumystary júrgizilmegen. Memleketimizdiń bas sahnasy bolyp kelgen saraı 1970 jyly sáýir aıynyń 22-i kúni esigin aıqara ashqan bolatyn. Búginde ol TMD elderi ishindegi arhıtektýralyq jaǵynan eń jaqsy jáne zilzalaǵa tózimdi ǵımarattardyń biri bolyp keledi. Osy jyldar ishinde saraı iri memlekettik, qoǵamdyq-saıası jáne mádenı sharalardyń ótetin orny bolyp ǵana qoıǵan joq, ol sondaı-aq, kóptegen shel eldik qonaqtardy da qabyldady. 1973 jáne 1986 jyldary bul jerde Búkilodaqtyq kınofestıval ótse, 1991 jyly saraı zaly táýelsiz Qazaqstannyń birinshi Prezıdenti N.Á.Nazarbaevqa ınaýgýratsııa ótkizgen oryn bolǵan.
"Respýblıka saraıy - óte kıeli jer, kıeli sahna. Men 1970 jyly, 30 jasymda osy sahnaǵa alǵash ret shyǵyp sımfonııalyq orkestrdiń súıemeldeýimen "Atameken" ánin oryndaǵan edim. Áli esimde, ol úkimettik kontsert bolatyn, zalda aýyldyń, óndiristerdiń eńbek ozattary, barlyq salanyń eń úzdik ókilderi jáne Qazaqstan úkimettiniń músheleri jınalǵan edi. Sol kezden bastap, osy zaldyń sahnasyna úlken qurmetpen shyǵamyn. Bul saraı elimizdiń kóptegen oryndaýshylaryna óner jolyna joldama bergen oryn", dedi respýblıkamyzdyń halyq ártisi, tanymal kompozıtor jáne ánshi Eskendir Hasanǵalıev.
Elimizdiń halyq ártisi Lakı Kesoglýdyń pikirinshe, saraı elimizdiń mártebeli, qadirli orny jáne bolashaqta da bola beredi. "Meniń bul sahnaǵa ár shyǵýym esimde umytylmas úlken áser qaldyrady. Kezinde bul sahnaǵa shyǵýdyń ózi qıyn bolatyn, arnaıy irikteý bolatyn, kásipqoı ánshiler ǵana shyǵa alatyn. Ókinishke oraı, áli kúnge deıin qalamyzda osy syndy sahna joq", dep atap ótti ol.
"Bul zaldyń erekshe energetıkasy bar. Ár oryndaýshy úshin estilýi men akýstıkasy mańyzdy, bul jóndeý kezinde birinshi orynda eskeriledi dep oılaımyn. Kúrdeli jóndeý jumystary bitkennen keıin, jumys isteýge laıyqty jaǵdaılar jasalynady degen úmittemin", dedi halyq kúılerin sheber oryndaýshy Asylbek Eńsepov.
Memlekettik "Gúlder" ansambliniń burynǵy ánshileri, halyqtyń kózaıymyna aınalyp úlgergen Maqpal Júnisova men Sembek Jumaǵalıev alǵash ret bul sahnaǵa shyqqandaryn esh umytpaǵan. "Biz úshin bul jer tek qana kontsert alańy emes, ekinshi jumys ornymyz, ekinshi úıimiz. "Gúlder"ansambli osy jerde bolǵanda biz kúnde daıyndyqqa keletinbiz. Bul elimizdiń tarıhı sahnasy. Óıtkeni, bul sahnada búginde dúnıede joq tanymal oryndaýshylar óner kórsetken, sondyqtan mádenıetimizdiń oshaǵyn árqashan qadirlep, qasterleıik. Tezirek, laıyqty jóndeý jumystary júrgizilip, saraı jańa beınede qaıtadan ashylsyn dep tileımiz", dedi olar.
Respýblıka saraıy kúrdeli jóndeý jumystaryna maýsym aıynyń 1-i kúni jabylady. 2011 jyly Táýelsizdigimizdiń 20 jyldyǵyna oraı saraı esigi qaıta ashylady dep josparlanýda.
