Bul shyn máninde ıgi jumys – Toqaev Qazaqstanǵa jetkizilgen Amýr jolbarystary týraly
ASTANA. KAZINFORM – Memleket basshysy Qasym-Jomart Toqaev Reseı prezıdenti Vladımır Pýtınge Qazaqstan aýmaǵynda jolbarysty qaıta jersindirý isinde qoldaý kórsetkeni úshin rızashylyǵyn bildirdi.
– Qazaqstanǵa tórt amýr jolbarysynyń jetkizilýi – Reseı Prezıdentiniń memlekettik saparynyń ózindik bir erekshe oqıǵasy boldy. Qurmetti Vladımır Vladımırovıch, Qazaqstan aýmaǵynda jolbarystardy qaıta jersindirý isine naqty qoldaý kórsetkenińiz úshin Sizge shynaıy rızashylyǵymdy bildiremin. Bul baǵaly syı týraly elimizdiń barlyq azamaty jaqsy biledi, – dedi Qasym-Jomart Toqaev Táýelsizdik saraıynda RF prezıdentimen kelissózderden keıingi BAQ ókilderine arnalǵan brıfıngte.
Sondaı-aq Prezıdent osy biregeı jobaǵa, shyn máninde ıgi sharýaǵa atsalysyp jatqan barlyq qazaqstandyq jáne reseılik mamandarǵa alǵys aıtty.
Buǵan deıin Reseıdiń tabıǵı resýrstar jáne ekologııa mınıstri Aleksandr Kozlov Qazaqstanǵa tartý etilgen Amýr jolbarystaryn jersindirý jóninde pikir bildirgen edi.
Aıta keteıik, 27-29 mamyr kúnderi Reseı Federatsııasy Prezıdenti Vladımır Pýtınniń Qazaqstanǵa memlekettik sapary ótedi. Memleketter basshylary bul saparda Qazaqstan men Reseı arasyndaǵy jan-jaqty strategııalyq seriktestiktiń jáne odaqtastyq qatynastardyń qazirgi jaı-kúıin, sondaı-aq ony nyǵaıtý perspektıvasyn talqylaıdy.
Búgin Memleket basshysy Qasym-Jomart Toqaev Reseı Prezıdenti Vladımır Pýtındi Táýelsizdik saraıynda resmı qarsy aldy.
