Bul sheshimmen depýtattar ózderiniń saıası saýattylyǵyn, dárejesiniń bıiktigin kórsete aldy - sarapshy
ASTANA. QazAqparat - Bul sheshimderimen depýtattar ózderiniń saıası saýattylyǵyn, dárejesiniń bıiktigin kórsete aldy. Májilisi depýtattarynyń Parlament Májilisi men barlyq deńgeıdegi máslıhattar depýtattarynyń merziminen buryn saılaýyn ótkizý týraly bastama kótergen úndeýi jaıynda Abaı atyndaǵy Qazaq ulttyq pedagogıkalyq ýnıversıteti «Sorbonna - Qazaqstan» ınstıtýtynyń halyqaralyq qatynastar kafedrasynyń meńgerýshisi, saıası ǵylymdar doktory Jomart Sımtıkov osyndaı pikir bildirdi.
«Besinshi saılanǵan Parlament Májilisi depýtattarynyń bastamasy barsha qazaqstandyqtardy eleń etkizgeni belgili. Halyq qalaýlylarynyń osyndaı sheshimine tikeleı áser etken «Qazaqstan jańa jahandyq naqty ahýalda: ósim, reformalar, damý» dep atalatyn Elbasynyń 2015 jyldyń 30 qarashasyndaǵy Joldaýy dep qabyldaý kerek. Sonymen qatar, oǵan qamshy bolǵan Memleket basshysynyń «Ult Jospary - qazaqstandyq armanǵa bastaıtyn jol» strategııalyq maqalasy der edik.
Bul sheshimderimen depýtattar ózderiniń saıası saýattylyǵyn, dárejesiniń bıiktigin kórsete aldy. Sebebi, táýelsizdiktiń shırek ǵasyrlyq kezeńinde Ult Josparynda kórsetilgen naqty tapsyrmalardy oryndaýǵa tyń saıası kúsh jańa kózqarastaǵy adamdar kerek ekenin túsingeninde. Osy turǵydan alǵanda bul úndeý der kezinde jáne ońtaıly usynys», dedi Jomart Sımtıkov.
Ol Májilistiń qazirgi quramy elimizdi jáne qoǵamdy damytý úshin kóp is tyndyrǵanyn atap ótip, merziminen buryn saılaý ótkizý jahandyq daǵdarysqa qarsy jańa baǵdarlamalardy júzege asyratyn shaqta der kezinde qabyldanatyn sheshim ekenin atap ótti.
«Tarıhı merzimnen buryn saılaý ótkizý Qazaqstan halqyn ortaq múdde men ortaq maqsat úshin biriktire túsedi, ekonomıkamyz úshin jáne búkil elimiz úshin qorǵanys sharalary bolyp tabylatyn daǵdarysqa qarsy isterdi, ıaǵnı Ult Josparyn tyń kúshpen saýatty, ári daǵdarysqa qarsy saıasatty durys júrgizýge múmkindik beredi. Ol memlekettik bıýdjetke túsetin salmaqty azaıtady. Álemdik daǵdarysqa qarsy jańa baǵdarlamalardy júzege asyrǵaly otyrǵanda merziminen buryn saılaý ótkizý durys jáne der kezinde qabyldanǵan sheshim bolyp tabylady dep esepteý kerek» dedi sarapshy.
