Bul sessııada Senat 89 zańnyń 14-in Májiliske keri qaıtarǵan
ASTANA. KAZINFORM — Senat tóraǵasy Máýlen Áshimbaev palatanyń 8 shaqyrylym úshinshi sessııasyndaǵy jumysyn qorytyndylady.
— Búgin biz Palatanyń úshinshi sessııadaǵy qorytyndy otyrysyn ótkizdik. Jalpy, Senat osy aralyqta 89 zańdy qarady. Olardyń 75-in maquldap, 14-in Májiliske qaıtardyq. Qaralǵan zańdardyń qatarynda 3 kodeks jáne 7 derbes zań bar. Atap aıtsaq, Prezıdentimizdiń tikeleı tapsyrmasymen ázirlengen jańa Bıýdjet jáne Salyq kodeksteri qabyldandy. Sondaı-aq, sý resýrstaryn tıimdi paıdalanýǵa zańnamalyq negiz qalyptastyratyn jańa Sý kodeksi qabyldandy, — dedi ol.
Senat spıkeri Túrkistan qalasyna erekshe mártebe beretin zań bekitilgenin eske saldy. Akvasharýashylyqty damytýdy jáne memlekettiń aýmaqtyq qorǵanys júıesin jetildirýdi kózdeıtin derbes zańdar kúshine endi.
— Nysanaly kapıtal qorlary men endaýment-qorlardyń qyzmetin retteıtin arnaıy zań qabyldandy. Qarjy naryǵyn damytýdy, tutynýshylardyń quqyqtaryn qorǵaýdy jáne alaıaqtyqqa qarsy is-qımyldy kúsheıtýdi kózdeıtin normalar da maquldandy. Búgingi otyrysta mindetti áleýmettik medıtsınalyq saqtandyrý salasyndaǵy máselelerdi sheshýge arnalǵan túzetýler toptamasyn qaradyq. Sonymen qatar, qylmystyq zańnama normalary ońtaılandyryldy, — dedi Máýlen Áshimbaev.
Sondaı-aq, ol Ornyqty damýy salasyndaǵy ulttyq maqsat-mindetterdiń iske asyrylýyna monıtorıng júrgizý jónindegi parlamenttik komıssııa belsendi jumys istep kele jatqanyn atap ótti.
— Máslıhattarmen ózara is-qımyl jónindegi keńestiń qyzmeti sapalyq jańa formatqa kóship, alǵash ret keńeıtilgen otyrysy ótkizildi. Senattyń halyqaralyq qyzmeti de 130-ǵa tarta mazmundy sharalarmen erekshelendi. Sondaı-aq, áriptesterimiz 170-ke jýyq depýtattyq saýal joldap, Úkimetke ózekti máselelerdi sheshý joldaryn usyndy. Osylaısha, Prezıdentimizdiń reformalaryn zańnamalyq turǵydan qamtamasyz etýge arnalǵan qyzmetimiz nátıjeli boldy dep aıta alamyz, — dedi Senat tóraǵasy.
Aıta keteıik, búgin Senattyń jalpy otyrysynda nekege turýǵa májbúrleý men «dropperlik» úshin qylmystyq jaýaptylyq engizildi.