Bul saılaýda N.Nazarbaevqa laıyqty básekelester bar - OSK múshesi M.Sársenbaev

ASTANA. QazAqparat - Bul saılaýda N.Nazarbaevqa laıyqty básekelester bar. Bul pikirdi búgin QR Ortalyq saılaý komıssııasynyń múshesi Marat Sársenbaev bildirdi.

«Men Elbasyna laıyqty básekelester joq, degen pikirmen kelispeımin. Máselen, 2011 jyly Elbasy N.Nazarbaevtan basqa Ǵ.Qasymov, Qazaqstannyń kommýnıstik halyq partııasynyń hatshysy J.Ahmetbekov syndy laıyqty básekelester boldy. Meniń oıymsha, dál osy 2 azamat sol saılaýda Elbasyǵa laıyqty qarsylas bola aldy», - dedi ol BAQ ókilderiniń saýalyna oraı.

Onyń atap ótýinshe, bıylǵy saıası naýqanda da QR Prezıdentine laıyqty básekelester bar.

«Ózderińizde biletindeı, Nursultan Ábishuly Nazarbaevtan basqa taǵy 2 adam kandıdat retinde tirkeýden ótip otyr. Olar: Qazaqstannyń kommýnıstik halyq partııasynyń ókili Turǵyn Ysqaquly Syzdyqov pen Qazaqstannyń kásipodaqtar federatsııasynyń tóraǵasy Ábilǵazy Qalıaqparuly Qusaıynov. Osy eki azamat resmı túrde tirkeýden ótti. Olar laıyqty kandıdat dep sanaımyn», - dedi M.Sársenbaev.