Bul saılaý ultymyzdy jarqyn keleshekke nyq qadam bastyratyn taǵdyrly qadam bolmaq - M. Altynbaev
ASTANA. QazAqparat - Bul saılaý jaı ǵana saılaý emes, bul saılaýda eldiń taǵdyry men ult bolashaǵy sheshiledi. Búgin Parlament Senatynyń jalpy otyrysynda Qazaqstan halqy Assambleıasy Keńesiniń kezekten tys prezıdenttik saılaý ótkizý jónindegi bastamasyn talqylaý barysynda senator Muhtar Altynbaev osylaı málimdedi.
«Men elimizde kezekten tys prezıdenttik saılaý ótkizý týraly usynysty búgingi ýaqyt talap etip otyrǵan múdde men múmkindik turǵysynan qaraımyn», - dedi senator.
Onyń aıtýynsha, jaqynda ótken Úkimettiń keńeıtilgen otyrysynda Elbasy memleket aldynda turǵan basty máselelerdi ashyp kórsetip, álemdik daǵdarys kezindegi jalpyulttyq strategııa men taktıkany taldap taratyp aıtyp berdi. Osy basqosýda Prezıdent elimizdi dendep turǵan daǵdarys joq ekenin, alaıda álemdegi dúmpýlerdiń aldyn alýǵa qamdaný kerektigin aıtqan edi.
«Halqymyzda «Qamdanǵan qapy qalmaıdy» degen qanatty sóz bar. Demek, biz jurt bolyp jumylyp, el bolyp eńse tiktep, aldaǵy kúnderdiń maqsat-muratyn aıqyndap alýymyz shart. Mine, sol sharttyń alǵashqy aıqyn belgisi halyq nazaryna usynyldy dep esepteımin. Bul saılaý jaı ǵana saılaý emes, bul saılaýda eldiń taǵdyry men ult bolashaǵy sheshiledi. Kezekten tys saılaýdyń eń basty qundylyǵy - Elbasyna beriletin senim mandaty halyqaralyq saıasattaǵy eń kúrdeli kzeńderdiń birinde halqymyzdy biriktirýdiń, «Qazaqstan-2050» strategııasynda aıqyndalǵan mejege toqtaýsyz umtylýdyń birden bir joly ekeni anyq. 2015 jylǵy saılaý ultymyzdyń bolashaqqa degen senimin nyǵaıta túsetin, jarqyn keleshekke nyq qadam bastyratyn taǵdyrly qadam bolmaq», - dedi senator.
Depýtattyń paıymynsha, Qazaqstan halqy saılaý arqyly beıbitshilik eń basty qundylyq ekenin kúlli álemge pash etedi. «Sebebi beıbitshilikti saqtaý, etnosaralyq kelisim men turaqtylyq, dinaralyq dıalog pen órkenıetter úndestigi - Elbasy saıasatynyń túpki máni», - dedi ol.
