Bul saılaý Qazaqstannyń álemdik qaýymdastyq aldyndaǵy bedelin kúsheıtedi - Ǵalym Mutanov
«QR Prezıdenti Qasym-Jomart Toqaev kezekten tys saılaý ótkizý týraly óte mańyzdy jáne barlyq qazaqstandyq qoǵam úshin qajetti sheshim qabyldady», - dep atap ótti QazUÝ rektory Ǵalym Mutanov.
Qazaqstan - demokratııalyq memleket. Elbasy strategııasyn tıimdi jáne sátti júzege asyrý úshin barlyq memlekettik, áleýmettik-ekonomıkalyq jáne qoǵamdyq-saıası jańǵyrýlarǵa qarqyndy serpin berý qajet.
«Tikeleı jappaı daýys berý jolymen jáne oǵan senim mandatyn berý arqyly halyqtyń óz Prezıdentin saılaý úderisi el tańdaǵan baǵyttyń sabaqtastyǵyn jáne turaqtylyǵyn qamtamasyz etedi. Bul ishki jáne syrtqy saıasattyń negizgi vektorlaryn júzege asyrýdaǵy konstıtýtsııalyq mehanızmderdi nyǵaıtyp, elimizdegi saıası jaǵdaılarǵa, qoǵamdy turaqtandyrý men biriktirýge oń áser beredi. Álemdik qaýymdastyq aldynda demokratııalyq reformalar jolymen kele jatqan memleket retinde Qazaqstannyń bedelin kúsheıtedi. Qazaqstanda qajetti saıası ınstıtýttar men azamattyq qoǵam qurylǵan, elektoraldy úderistiń oń tájirıbesi jınaqtalǵan. Qazaqstandyqtardyń mindeti - óziniń azamattyq boryshyn oryndap, laıyqty úmitkerdi saılaý», - deıdi Ǵ.Mutanov.
Rektordyń aıtýynsha, elimizdegi eń iri oqý orny - ál-Farabı atyndaǵy Qazaq ulttyq ýnıversıtetiniń ujymy Qazaqstan Prezıdentin kezekten tys saılaý týraly sheshimdi tolyqtaı qoldaıdy.
«Oqytýshylar men stýdentterdiń myńdaǵan qaýymdastyǵy elektorattyń belsendi quramy retinde óziniń jaýapty azamattyq pozıtsııasyn tanytyp, Prezıdentti kezekten tys saılaýǵa belsendi qatysady jáne eldiń órkendeýi úshin sanaly tańdaý jasaıdy», - dep atap ótti QazUÝ rektory.
