Bul saparym hattamalyq kezdesý ǵana emes — Italııa Mınıstrler Keńesiniń tóraǵasy

ASTANA. KAZINFORM — Memleket basshysy Qasym-Jomart Toqaevpen birge Astana halyqaralyq forýmynyń ekinshi kúnindegi plenarlyq sessııaǵa qatysqan Italııa Mınıstrler Keńesiniń tóraǵasy Djordja Melonı Astanadaǵy saparynyń mánine toqtaldy.

— Men búgin Astanada bolǵanyma jáne Prezıdent Toqaev pen Qazaqstan Úkimeti ótkizgen osy asa mańyzdy is-sharaǵa qatysqanyma óte qýanyshtymyn. 

Búgin meniń Italııa Respýblıkasy Mınıstrler Keńesiniń tóraǵasy retindegi Qazaqstanǵa alǵashqy resmı saparym bastalady. Men ony hattamalyq sapar ǵana dep eseptemeımin. Biz osy sapardy Qazaqstan úkimetimen aradaǵy strategııalyq yntymaqtastyqty qarjylandyrý turǵysynan, qalyptasyp jatqan baılanystardy nyǵaıtý turǵysynan bekitkimiz keledi, — degen Italııa Úkimetiniń basshysy Ortalyq Azııa memleketteriniń basshylaryn búgin ótetin «Italııa-Ortalyq Azııa» sammıtiniń ótýine yqpal etkeni úshin alǵys bildirdi.

Aıta keteıik, keshe keshke Italııa premeri Qazaqstanǵa resmı saparmen keldi. 

Sondaı-aq, mártebeli meımannyń qatysýymen «Ortalyq Azııa — Italııa» sammıti ótedi. 

Eske salsaq, elordada kesheden beri Astana halyqaralyq forýmy ótip jatyr. 

Forýmǵa 7 000-nan astam qatysýshy tirkelgen. Eýropa, Ortalyq Azııa, Taıaý Shyǵys pen Afrıka elinen BUU, AAU, HKU jáne DZMU sııaqty jetekshi halyqaralyq uıymdardyń atynan 160-tan astam spıker shaqyrylǵan. Eki kún boıy olar túrli salanyń sarapshylarymen birlesip, memleketaralyq yntymaqtastyq modelin, jańa jahandyq áriptestik qurýdyń keleshegin talqylaıdy.