Bul salmaqty saıası málimdeme - Erlan Qarın aýdan ákimderin saılaý jaıly

NUR-SULTAN. Qazaqparat - Prezıdenttiń kómekshisi Erlan Qarın Memleket basshysynyń taıaýda jarııa etken reformalyq bastamalary jóninde pikir bildirdi. Onyń aıtýynsha, Parlamenttiń alǵashqy sessııasynda eldegi qoǵamdyq jáne saıası ómirge edáýir ózgeris engizetin málimdeme jarııalanǵan, dep habarlaıdy Qazaqparat tilshisi.

«Prezıdenttiń ótken aptada Parlamenttiń birinshi sessııasynda jarııalaǵan málimdemesi - prezıdenttik saıası reformalardyń úshinshi paketi dep aıtýǵa bolady. Bul jerde eń úlken jańalyq - Parlament pen máslıhattarǵa saılaý kezinde saılaý tabaldyryǵyn qazirgi 7 paıyzdan 5 paıyzǵa tómendetý jónindegi sheshimi. Bul jóninde uzaq ýaqyt boıy aıtylyp júrgenimen, ártúrli pikir boldy. Sarapshylardyń kóbi saılaý tabaldyryǵyn túsirý bastamasyn kótergenimen, keıbiri asyǵystyq tanytpaý kerek dedi. Biraq elimizdegi plıýralızmdi eskere otyryp, partııalardyń róliniń artyp kele jatqanyn eskerip, Prezıdent óziniń úndeýinde depýtattarǵa oı saldy», - dedi Erlan Qarın elordada ótip jatqan «Prezıdenttik jańa saıası reformalar paketi» atty dóńgelek ústelde.

Onyń aıtýynsha, bul durys sheshim. Sebebi atalmysh ózgeris arqyly Parlament pen máslıhattar aldaǵy saılaýlarda qoldaý taýyp, ózderiniń baǵdarlamalaryn jetkizýde qosymsha tetikke ıe bolady.

«Ekinshi úlken bastama - saılaý bıýlletenderinde «bárine qarsy» normasyn engizý. Bul jóninde de ártúrli pikirtalas boldy. Mundaı norma bizdiń zańnamada bolǵan. Biraq keıin sarapshylardyń pikirin eskere otyryp, alynyp tastalǵan. Qazirgi ýaqytta atalmysh norma azamattarǵa teń quqyq berý úshin engizilgeli otyr. Bul da bizdiń elimizdiń saıası damýy jolyndaǵy mańyzdy sheshim dep oılaımyn. Óıtkeni protestik jáne basqa da oı-pikirlerdiń ınstıtýtsııalanýyna da alǵyshart qalyptastyrady», - dedi ol.

Sonymen qatar Erlan Qarın Memleket basshysynyń aldaǵy ýaqytta aýdan ákimderi de saılaý arqyly anyqtalatynyn aıtqanyn eske saldy.

«Buǵan deıin Prezıdent aýyl ákimderi týraly aıtyp kelse, bul joly joǵary minberden aýdan ákimderin de saılaý kerektigin de jarııa etti. Bul - Memleket basshysy tarapynan aıtarlyqtaı salmaqty saıası málimdeme. Sebebi tuńǵysh ret aldaǵy ýaqytta Memleket basshysy odan da joǵary deńgeıdegi saılaý júıesine kóshýimiz múmkin ekenin aıtyp qaldy», - dedi Erlan Qarın.