Bul patrıottyq shyǵarmalarǵa kórsetilgen úlken qurmet dep bilemin - «Táýelsizdik tolǵaýy» baıqaýynyń júldegeri
ASTANA. Aqpannyń 12-si. QazAqparat /Jasulan Amanbaıuly/ - «Bul syılyq jeke maǵan ǵana emes, jalpy qazaq ónerine, onyń ishinde patrıottyq shyǵarmalarǵa kórsetilgen úlken qurmet dep bilemin».
Keshe Astanada qorytyndysy shyǵarylǵan І Respýblıkalyq «Táýelsizdik tolǵaýy» baıqaýynyń júldegeri, ánshi, sazger Estaı Álikeev QazAqparat tilshisine bergen suhbatynda osylaı aıtty.
«Men bul baıqaýǵa belgili opera ánshileri Dına Hamzına men Qaıyrjan Berdibaevtyń oryndaýyndaǵy «Qazaqstan» jáne óz repertýarymdaǵy «Alǵa, Qazaqstan» degen eki ánimdi jibergen bolatynmyn. Mine endi «Alǵa, Qazaqstan» degen ánim boıynsha «Eń úzdik qazirgi zaman ánderi» atalymynda júldeli 3-shi orynǵa ıe bolyp otyrmyn. Bul tapsyryspen jazylǵan shyǵarma», deıdi Estaı Álikeev. Sazgerdiń aıtýynsha, dúnıege kelgenine 1 jyldan asqan bul ánniń jazylýyna Dáýlet Turlyhanovtyń, «sport týraly án jazsań, durys bolar edi. Bizde baıraqty básekelerde oryndalatyn sport taqyrybyndaǵy týyndylar joqtyń qasy», degen usynysy túrtki bolǵan.
«Jalpy óner adamy úshin eńbeginiń baǵalanǵany, syndarly sarapshylardyń talqysynan súrinbeı ótkeni úlken jetistik. Árıne, shyǵarma syılyq alý úshin jazylmaıdy. Degenmen alamanǵa túskennen keıin, laıyqty baǵasyn berip jatsa, mártebeń ósip, kóńiliń marqaıyp qalady. Bul shyǵarmashylyqqa serpin berip, shabytqa shabyt qosyp, izdenisti arttyra túseri kúmánsiz», deıdi Estaı Álikeev.
