Bul pesa avtor men rejısserdiń arasyndaǵy shyǵarmashylyq baılanystyń jemisi boldy - Nurǵalı Oraz
ALMATY. 3 jeltoqsan. QazAqparat /Erlik Erjanuly/ - Keshe Almatydaǵy Ǵabıt Músirepov atyndaǵy Qazaq memlekettik balalar men jasóspirimder teatrynda "Taýdaǵy tún" dep atalatyn lırıkalyq dramanyń tanystyrylymy ótti. Qoıylymnyń avtory jazýshy, jýrnalıst Nurǵalı Oraz.
"Bul meniń "Adasqan juldyzdan" keıingi ekinshi pesam. Alǵashqy shyǵarmamdy Qazaqstanǵa eńbegi sińgen qaıratker, belgili rejısser Baltabaı Seıitmamytuly qoıǵan bolatyn. Sodan keıin avtor men rejısserdiń arasynda shyǵarmashylyq baılanys paıda boldy. Baltekeń meniń áńgimeler jınaǵymdy oqyp, "Baq qusy" degen týyndymnyń jelisi boıynsha pesa jazýǵa tapsyrys berdi. Oǵan jańa keıipkerler qosyp, jańa sıýjet qosyp osy ekinshi pesany daıyndadym", - deıdi N.Oraz. Avtordyń aıtýynsha, dramadaǵy basty keıipker - jazýshy. Ýaqyt - qazirgi zaman. Onda aýyl, qala jáne bir sulý kelinshektiń kúrdeli taǵdyry týraly aıtylady. Jazýshynyń paıymdaýynsha, jalpy jalǵyzdyq degen másele barlyq adamǵa ortaq. Adam ońasha qalǵanda barlyq jerde ózin jalǵyz sezinedi. Mysaly, óte sulý kelinshektiń jalǵyz qalýy múmkin emes sııaqty kórinedi. Shyn máninde júrektegi jalǵyzdyq bul qoıylymda aıqyn seziledi.
