«Bul — ortaq jeńis»: Prezıdentten marapat alǵan ustaz ben shákirt áserimen bólisti
ASTANA. KAZINFORM — Keshe Aqordada Prezıdent Qasym-Jomart Toqaev halyqaralyq pán olımpıadalarynda júlde alǵan oqýshylar men stýdentterdi marapattady. Jıynǵa 21 laýreat, olardyń ustazdary men tálimgerleri qatysty.
Qazaqstandyq jastar fızıka, hımııa, bıologııa, matematıka, ınformatıka, geografııa jáne lıngvıstıka boıynsha ótken halyqaralyq olımpıadalarda 6 altyn, 11 kúmis jáne 4 qola medal ıelengen.
Jeńimpazdardy daıyndaǵan ustazdardyń da eńbegi elendi. Birqatar pedagog memlekettik nagradalarmen, sonyń ishinde «Qurmet» ordeni, «Eren eńbegi úshin» jáne «Shapaǵat» medaldarymen marapattaldy.
Jibek Joly telearnasynyń «Búgin.LIVE» baǵdarlamasyna Memleket basshysynyń qolynan marapat alǵan Mansur Mamadahýnov pen onyń ustazy Meıramgúl Kenjehanova qonaq boldy.
Meıramgúl Kenjehanova — Astana qalasyndaǵy Nazarbaev Zııatkerlik mektebiniń fızıka páni muǵalimi. Ol kúni keshe kóp jyldyq ustazdyq eńbegi men shákirtterin halyqaralyq olımpıadalarǵa daıyndaǵany úshin «Qurmet» ordenimen marapattaldy.
— Atym atalǵan sátte qatty qobaljydym. Árıne, qýanyshtymyn. Bul — meniń ǵana emes, shákirtterimniń, áriptesterimniń jáne ata-analardyń ortaq jeńisi. Memlekettiń ustaz eńbegin joǵary baǵalaýy bizge úlken motıvatsııa berip, zor senim júkteıdi, — dedi ustaz.
Al onyń shákirti Mansur Mamadahýnov ınformatıkadan halyqaralyq olımpıadada kúmis medal ıelengen. Ustazynyń aıtýynsha, bul — júıeli daıyndyq pen birneshe mamannyń birlesken eńbeginiń nátıjesi.
— Bul jetistikke júıeli jumystyń arqasynda qol jetkizdik. Munda muǵalim men shákirtten bólek, professorlar men olımpıada jattyqtyrýshylarynyń da úlesi bar. Al balanyń damýyna eń úlken ınvestıtsııa salatyn — ata-ana, — dedi Meıramgúl Kenjehanova.
Halyqaralyq olımpıada 9–10 tamyzda Tashkent qalasynda ótti. Jarys eki kezeńnen turdy. Ár kezeńde qatysýshylarǵa úsh kúrdeli esepten berildi. Baıqaýǵa 90-nan astam memleketten 370-ke jýyq oqýshy qatysqan.
— Aqordaǵa baryp, Prezıdentten marapat alǵanyma qýanyshtymyn. Bul men úshin úlken motıvatsııa boldy. Aldaǵy ýaqytta odan ári damýǵa jiger berdi. Atym atalǵan sátte qatty qobaljyp, birden sene almadym, — dedi Mansur Mamadahýnov.
Jas órenniń ınformatıkaǵa qyzyǵýshylyǵy 7-synypta artqan. Oǵan deıin matematıkaǵa beıim bolǵan Mansur keıin ınformatıkaǵa den qoıa bastaǵan.
— Maǵan ınformatıkada kúrdeli eseptiń sheshimin birneshe saǵat oılanyp, óziń tabatynyń unaıdy. Sheshimin tapqan sátte erekshe sezimde bolasyń, — dedi ol.
Meıramgúl Kenjehanovanyń aıtýynsha, olımpıadaǵa daıyndyq oqýshynyń bilimin tereńdetip qana qoımaı, oılaý qabiletin de damytady.
— Mekteptegi bilim — berik irgetas. Al olımpıadada jınaǵan tájirıbe men bilim sol irgetastyń ústine qalanǵan ǵımarat ispetti. Olımpıadalar oqýshynyń bilimin tereńdetip qana qoımaı, joǵary deńgeıde oılaý qabiletin qalyptastyrady, — dedi ustaz.
Aıta keteıik, Prezıdent olımpıada júldegerlerine syıaqy sertıfıkattaryn da tabystady.
