«Bul mindet joǵary deńgeıde oryndalǵan» — Moldova OSK tóraǵasy Quryltaı saılaýyna daıyndyq týraly
ASTANA. KAZINFORM — Qazaqstanda jańa Konstıtýtsııa qabyldanǵannan keıin Quryltaı depýtattarynyń alǵashqy saılaýy ótip jatyr. Daýys berý barysyn halyqaralyq baıqaýshylar qadaǵalaýda. Moldova Respýblıkasy Ortalyq saılaý komıssııasynyń tóraǵasy Anjelıka Karaman № 228 saılaý ýchaskesine baryp, saılaý protsesiniń uıymdastyrylýyna qatysty pikir bildirdi.
Anjelıka Karaman qazirgi saılaýdyń jańa saılaý júıesi aıasynda ótip jatqanyn jáne konstıtýtsııalyq reformany júzege asyrý kezeńderiniń biri ekenin atap ótip, onyń aıryqsha mańyzyna toqtaldy.
— Eń aldymen, bul saılaýdy mynadaı erekshe mazmunda qarastyrǵan jón dep oılaımyn. Bul — Qazaqstan Respýblıkasynyń jańa Konstıtýtsııasy men jańa saılaý júıesi negizinde uıymdastyrylyp otyrǵan Quryltaıdyń alǵashqy saılaýy. Sondyqtan bul — konstıtýtsııalyq reformany júzege asyrýdaǵy mańyzdy kezeń, — dedi ol.
Halyqaralyq baqylaýshynyń aıtýynsha, olar barǵan saılaý ýchaskelerinde daýys berý protsesi jaqsy deńgeıde ótken. Saılaýshylar daýys berý tártibi týraly habardar, ýchaskelik komıssııa músheleri óz mindetterin jaqsy biledi, al jumys jolǵa qoıylǵan.
A.Karaman halyqaralyq baqylaýshylardyń ózderi barǵan barlyq ýchaskede qyzyqtyrǵan suraqtaryna tolyq jaýap alǵanyn atap ótti.
— Daýys berý barysyna saılaý qyzmetkerleriniń daıyndyq deńgeıi erekshe áser etedi. Bul óte mańyzdy, óıtkeni saılaý protsesine degen senim osydan qalyptasady, — dedi Moldova OSK tóraǵasy.
Ol múgedektigi bar azamattarǵa qajetti jaǵdaı jasalýyn oń tájirıbelerdiń qataryna qosty.
— Biz barǵan barlyq saılaý ýchaskesinde múgedektigi bar azamattarǵa arnalǵan jaǵdaıdyń jasalǵanyn kórdik. Aqparatty aýdıo formatynda tyńdaý múmkindigi bar, sondaı-aq arnaıy trafaretter qarastyrylǵan. Bul halyqaralyq standarttarǵa saı keledi, — dep málimdedi Moldova OSK tóraǵasy.
Sóz sońynda Anjelıka Karaman qazaqstandyq áriptesterine saılaý komıssııalary músheleriniń kásibı daıarlyǵyn arttyrý baǵytyndaǵy yntymaqtastyqqa nıetti ekenin aıtty.
— Ortalyq saılaý komıssııasyndaǵy áriptesterime kásibılikti arttyrýǵa baǵyttalǵan jumysty sátti jalǵastyrýdy tileımin. Saılaý qyzmetkerlerin oqytýǵa qanshalyqty kóp kúsh jumsalǵany kórinip tur. Saılaýdan keıin áriptesterimiz atqarylǵan jumysty saralap, saılaý rásimderin uıymdastyrýdy odan ári jetildirý baǵytyn jalǵastyrady dep senemiz. Biz de ozyq tájirıbelerdi úırenýge múddelimiz, — dep qorytyndylady Anjelıka Karaman.
Eske salaıyq, buǵan deıin qyrǵyzstandyq baqylaýshy Quryltaı saılaýyna qatysty pikirin aıtqan edi.
