Bul maýsymda Búkilálemdik boks serııasynda kóp erekshelikter boldy - «D&G Milano Thunder» komandasynyń bas bapkeri
ALMATY. 2 aqpan. QazAqparat /Erlik Erjanuly/ - Túrli elde bolyp, tájirıbe almasýdyń paıdasy mol. Ony Italııanyń «D&G Milano Thunder» komandasynyń bas bapkeri Franchesko Damıanı búgin Almatyda erteń «Astana arlandary» komandasymen bolatyn jekpe-jek qarsańynda uıymdastyrylǵan baspasóz máslıhatynda aıtty.
«Búkilálemdik boks serııasynyń ekinshi maýsymynda birinshige qaraǵanda kóp erekshelikter bar. Byltyr biz eýropalyq konferentsııada óner kórsetken edik. Bul maýsymda komandalar eki topqa ǵana bólindi. Eń jaqyn qala - Máskeý, al qalǵany óte alysta jatyr», - deıdi F. Damıanı. Al «Astana arlandary» komandasynyń bas dırektory Bolat Mankenovtyń aıtýynsha, bul maýsym pishini jaǵynan óte qyzyq jáne kúrdeli. Alǵashqy maýsymda qurlyqtyq birinshilik jeńimpazdary ózara kezdesse, endi toptyq kezeńde túrli elder ózara toptastyrylyp otyr. Barlyq el Olımpıada oıyndaryna daıyndalyp jatqandyqtan, bastapqy kezde kóptegen komandalar óz quramyn jasaqtaýda túrli qıyndyqtarǵa kezdesti. Degenmen bári bul tyǵyryqtan shyǵyp otyr.
Jalpy bul maýsymda «A» tobynda Astana, Máskeý, Mılan, Bangkok, Los-Andjeles pen Mýmbaı qalalarynyń komandalary óner kórsetýde. Al «B» tobynda Baký, Beıjiń, Leıptsıg, Mehıko, Parıj, Ystambul komandalary toptasqan. Qazir onda Italııa men Qazaqstan, Ázirbaıjan men Meksıka óz toptarynda kósh bastap keledi. Erteń endi astanalyqtar men mılandyqtardan bólek, mehıkolyqtar men beıjińdikter, mýmbaılyqtar men bangkoktyqtar, máskeýlikter men los-andjelestikter, ystambuldyqtar men leıptsıgtikter, al arǵy kúni bakýlikter men parıjdikter kezekti jekpe-jekterin ótkizedi. Odan keıin olar 11-13 aqpanda aqtyq ret kezdesedi. Onda óz tobynda úzdik shyqqan 8 komanda jartylaı fınalda, al onyń jeńimpazdary aqtyq synda Búkilálemdik boks serııasynyń ekinshi maýsymyndaǵy kýbok jeńimpazyn anyqtaıdy.
Byltyr aqtyq saıysta Parıj ben Astana qalalarynyń komandalary kezdesip, frantsýzdar kýboktyń tuńǵysh ıegeri atanǵan bolatyn.
