Bul másele meni qatty alańdatady – Prezıdent esirtkiniń taralý qaýpi jaıly

ASTANA. QazAqparat – Biz esirtkini qoldanýdyń, daıyndaýdyń jáne taratýdyń jolyn kesip, tamyryna balta shabýǵa tıispiz. Áıtpese, búkil elimizdiń bolashaǵy bulyńǵyr bolady. Túrkistanda ótip jatqan Ulttyq quryltaıda Prezıdent Qasym-Jomart Toqaev osylaı málim etti, dep habarlaıdy QazAqparat tilshisi.

«Jas urpaqtyń, ásirese, qazirgi qubylmaly zamanda synı turǵydan oılaı bilýi mańyzdy. Balalarymyzdyń tanymy keń bolýyna jaǵdaı jasaýymyz qajet. Bul týraly belgili qoǵam qaıratkeri Jaqsybek Qulekeev óte oryndy pikir aıtty. Mektepte oqýshylardyń tulǵa retinde qalyptasýyna yqpal etetin dárister oqytylýǵa tıis.

Jastar aqparatty qoryta bilýdi, ýaqytyn durys paıdalanýdy, qarjy saýattylyǵyn mektep qabyrǵasynan bile bastaýy qajet. Óskeleń urpaqty túrli oıyndarǵa qumar bolýdan saqtandyrý kerek. Bul másele boıynsha quryltaıdyń birqatar músheleri, sonyń ishinde belgili sportshy Islam Baıramýkov jaqsy aıtty. Jeńil jolmen paıda tabý jaqsylyqqa aparmaıtynyn únemi túsindirip otyrǵan jón. Adal tabys adal eńbekpen keledi», - dedi Qasym-Jomart Toqaev.

Bul rette Prezıdent jastar arasyndaǵy nashaqorlyq máselesine erekshe toqtaldy.

«Bul – ult saýlyǵyna zor qaýip tóndiretin kesel. Esirtki jastardyń janyn da, tánin de ýlap jatyr. Biz esirtkini qoldanýdyń, daıyndaýdyń jáne taratýdyń jolyn kesip, tamyryna balta shabýǵa tıispiz. Áıtpese, búkil elimizdiń bolashaǵy bulyńǵyr bolady. Bul másele meni qatty alańdatady. Hımııalyq esirtkiler naryqta keń aýqymda satylýda. Krımınaldyq toptar jastardy osyndaı zańsyz áreketterge tartyp jatyr», - dep toqtaldy Memleket basshysy.