Bul kúni sharshy alańda jasyndaı jarqyldaǵan boksshy Bekzat Sattarhanov dúnıege kelgen

2000 jyly Sıdneıde ótken XXVII-shi Olımpıadada jartylaı jeńil salmaqta (57 kg deıin) chempıon ataǵyn jeńip alyp, qazaqtyń mereıin asqaqtatqan bylǵary qolǵap sheberi tiri bolsa, búginde 36 jasqa tolar edi.

Bekzat Sattarhanov Ońtústik Qazaqstan oblysy Túrkistan qalasynda týǵan. Ol Túrkistan qalasyndaǵy qarapaıym otbasynda dúnıege kelgen. Bekzat ákesi Seıilhan men anasy Syrlykúldiń kenje balasy. Sattarhanovtardyń Bekzattan ózge mektep qabyrǵasyndaǵy sporttyq básekelerde oza shapqan úsh uly boldy. Baǵdat, Bolat, Maqsat esimdi balalary da sportty serik etkenimen, Bekzat sekildi eshqaısysy aldyna bıik murat qoımaǵan kórinedi. Sábı kúninde ol óte názik, aýrýshań, áljýaz bolǵan eken. Sondyqtan Bekzattan ataǵy jer júzine jaıylatyn dańqty boksshy shyǵady dep eshkim oılamasa kerek.

Alǵashynda ózin-ózi qorǵap úırensin degen oımen ata-anasy Bekzatty kúres úıirmesine qatystyrady. Alaıda kúreske yntasy bolmaı, ekinshi jaǵynan kúrespen aınalysý boıdyń ósýin tejeıtinin uǵyp úıirmege barmaı, birden boksqa bet burady. 1986-1996 jyldar aralyǵynda Abaı atyndaǵy mektep ınternatta, keıin Jumabek Edilbaev atyndaǵy №18 orta mektepte oqıdy. 1995 jyly alǵash ret boks úırimesine jazylyp, balalar bapkeri Nurlan Jumabaevtan tálim ala bastaıdy. Ata-anasy men týystary Bekzattyń boksqa degen yntasyn baıqaǵanymen, muny jaı, ótpeli kezeń dep oılaǵan. Biraq ol bokspen shuǵyldanǵanyna bir jyl tolmastan respýblıkalyq saıystyń jeńimpazy atanyp, bylǵary qolǵapty beker kımegenin dáleldeıdi.

Zań salasy mamandyǵyn ıgergen. Aldymen Muhtar Áýezov atyndaǵy Ońtústik Qazaqstan memlekettik ýnıversıtetiniń dene shynyqtyrýfakýltetine túsip, keıin Túrkistan qalasyndaǵy Qoja Ahmet ıAsaýı atyndaǵy halyqaralyq qazaq-túrik ýnıversıtetiniń zań fakýltetin támamdaǵan. Bekzat boksta Serik Qonaqbaevty úlgi tutqan. Munyń sebebi de joq emes. 1980 jyly Máskeý Olımpıadasynyń fınalynda Serik Qonaqbaev judyryqtasqan sátte Bekzat besikte jatqan sábı edi. Anasy Syrlykúl Sattarhanovanyń Serik Qonaqbaev sekildi Bekzat ta chempıon bolsyn degen úlken armany bolǵan. Bekzat keıin ana armanyn oryndaıdy da. Ol Sıdneıdegi jeńisin Túrkistan qalasynyń 1500 jyldyǵyna tartý etetindigin aıtqan.

Ol bokstan halyqaralyq dárejedegi sport sheberi, Qazaqstanǵa eńbek sińirgen sport sheberi bolǵan. Sondaı-aq, І dárejeli «Barys» ordeniniń birinshi ıegeri. 1998 jyly ótken álem chempıonatynyń, 1999 jylǵy Azııa chempıonatynyń kúmis júldegeri atanǵan.

Sportshy 2000 jyldyń 31 jeltoqsany kúni, jańa jylǵa sanaýly mınýttar qalǵanda, Shymkent qalasy janyndaǵy Temirlan beketi mańynda avtokólik apatynan qaza boldy.