Bul kúni beıbit kúnniń batyry Qumarbek Jáketaıuly dúnıege kelgen
ASTANA. QazAqparat - Búgin «Halyq súıiktisi» ulttyq syılyǵy aıasynda taǵaıyndalǵan «Batyl júrek» qoǵamdyq syılyǵynyń ıegeri, 2016 jyly 4 jeltoqsan kúni «Astana-Kókshetaý» tas jolynda bolǵan atyshýly kólik apaty kezinde adamdardy qutqaramyn dep júrip janyn pıda etken beıbit kúnniń batyry Qumarbek Jaketaıuly ómirge kelgen kún. Bul týraly Feısbýktegi paraqshasynd a marqumnyń uly Nurbolat Qumarbekuly habarlady.
«Búgin aqpannyń 3-i - ákemniń týǵan kúni. Marqum ákem ómirde bolǵanda búgin 51 jasqa aıaq basar edi. Janyńyz Jánnatta bolsyn, ákeshim!» dep jazdy ol.
Eske salsaq, 4 jeltoqsanda Kókshetaý tas jolynda jantúrshigerlik apatta úsh jasar bala qutqaryldy. Kýágerler Qumarbek Jaketaıulynyń saý-tamtyǵy qalmaǵan kólik ishinen kishkentaı balany aman alyp shyqqanyn aıtady. Odan keıin artqy oryndyqta otyrǵan qyz balany qutqarýǵa umtylǵan ol art jaqtan qatty jyldamdyqpen kelip soǵylǵan avtobýstyń astynda qalǵan. Áleýmettik jelilerde Qazaqstan halqy marqumnyń otbasyna kómek kórsetý aktsııasyn uıymdastyrdy.
Odan bólek, «Halyqtyń súıiktisi - Narodnyı lıýbımets goda» qoǵamdyq syılyǵynyń uıymdastyrýshylary men ádilqazylary «Batyl júrek» qurmetti syılyǵyn eren erligi úshin Qumarbek Jáketaıulyna berýdi durys dep sheship, bıyl 14 qańtar kúni syılyqty onyń uly Nurbolatqa tabystady.
Qumarbek Jaketaıuly Býrabaı aýdany Jańajol aýylynyń turǵyny. 1991 jyly Mońǵolııadan atamekenge oralǵan. Artynda úsh balasy, jary qaldy. Ol ómiriniń sońǵy sátinde qarshadaı balany aman alyp alýǵa kómektesip, órimdeı jas qyzdy qutqaryp qaldy. Eki jastyń ómiri úshin óz janyn pıda etti.
