Meniń jeńisim – búkil komandanyń eńbegi – Ilıa Mızernyh

ALMATY. KAZINFORM – Ońtústik Koreıanyń Kanvondo qalasynda ótip jatqan jasóspirimder arasyndaǵy qysqy olımpıada oıyndarynada Qazaqstanǵa tarıhı altyn syılaǵan 16 jastaǵy shańǵyshy Ilıa Mızernyh jarystaǵy áserimen bólisti.

Jasóspirimder arasyndaǵy qysqy olımpıadada Qazaqstan qorjynyna tuńǵysh altyndy salǵan Ilıa Mızernyh elge oraldy. Sportshyny Almaty áýejaıynda bir top jankúıerleri men jaqyndary ystyq yqylaspen qarsy aldy.

«Men jattyqtyrýshynyń nusqaýyn múltiksiz oryndadym. Bapkerim ne iste dese, sony aınytpaı qaıtaladym. Iá, alańdaýshylyq boldy. Tuǵyrǵa shyqqanda erekshe tolqynys boldy. Meni ózime bári artta qaldy, alda tek jaqsylyqtar kútip tur dedim. Tapsyrmany oryndadyq dep oılaımyn, meniń jeńisim – búkil komandanyń, onyń ishinde jattyqtyrýshylar quramynyń eńbegi. Bizdiń jigitter árqashan bir-birine kómektesip, motıvatsııa beredi. Maǵan qoldaý bildirgen jankúıerlerge alǵysym sheksiz»- dedi Ilıa Mızernyh.

Buǵan deıin shańǵymen tuǵyrdan sekirýden Qazaqstan komandasynyń múshesi Ilıa Mızernyh Kanvondaǵy jasóspirimder Olımpıadasynyń chempıony atanǵany týraly jazǵan edik. Alǵashqy múmkindikten soń Mızernyh úshinshi orynyn saqtap qaldy. Al ekinshi múmkindikte nátıjesin jaqsartyp, keıin birinshi orynǵa shyqty.

Qazaqstan tarıhyndaǵy tuńǵysh altyn medaldi jeńip alǵan Ilıa Mızernyhty Prezıdent Qasym-Jomart Toqaev aıtýly jeńisimen quttyqtady.