Bul kelisim Bakýdiń turaqty, beıbit ómirge umtylysynyń kórinisi – Álıev

ASTANA. KAZINFORM – Ázerbaıjan prezıdenti Ilham Álıev AQSh tarapyna Ázerbaıjan men Armenııanyń beıbit kelisim jasaýdaǵy sheshýshi róli úshin alǵysyn bildirdi. Bul oqıǵany ol Ońtústik Kavkazdy damytý men ondaǵy turaqtylyqty qamtamasyz etý baǵytyndaǵy tarıhı qadam, dep baǵalady, dep habarlaıdy Kazinfrom agenttiginiń menshikti tilshisi.

-Eger prezıdent Tramp pen onyń komandasy jáne bizdiń jaqyn dosymyz Ýıtkoff pen onyń komandasy bolmaǵanda Armenııa men Ázerbaıjan osy ýaqytqa deıin kelissóz júrgizip jatatyn ba edi,-dedi prezıdent.

AQSh tarapynan jasalǵan sheshýshi qadamdardyń biri «Bostandyqty qoldaý týraly aktige» engizilgen 907-shi túzetýdi alyp tastaý boldy. Ol 1992 jyldan beri Ázerbaıjanǵa tikeleı kómekke tyıym salyp kelgen edi. Álıev bul qadamdy tarıhı mańyzdy dep baǵalady.

-Men prezıdent myrzaǵa 33 jyldan keıin shekteýdi alyp tastaǵany úshin rızashylyǵymdy bildiremin. Ázerbaıjan halqy bul kúndi zor rızashylyqpen, abyroımen este saqtaıtyn bolady,-dedi Álıev.

Beıbitshilik bolashaǵy týraly aıta kele Ázerbaıjan basshysy kelisimniń Bakýdiń turaqty beıbit ómir men óńirlik ıntegratsııaǵa degen umtylysyn kórsetetinin atap ótti.

Bul rette ol Ázerbaıjan aımaqtarynda qaýipsiz kólik dáliziniń ashylǵanyn erekshe atap ótti. Onyń sózinshe, bul dáliz óńir úshin de Armenııanyń ózi úshin de kóp múmkindik ashady.

Jýrnalısterdiń saýaldaryna jaýap bere kele Ázerbaıjan prezıdenti kelisimge remı qol qoıýdy jedeldetý qajettigin atap ótti.

- Eger qujatqa aldyn ala qol qoıylǵan bolsa, ony resmı bekitý isi sozylyp ketpeýi kerek,-dep qosty ol. Bul rette prezıdent Armenııanyń Ázerbaıjanǵa terrıtorııalyq talap qoımaýy kerektigin eskertti.

Aıta keteıik, osyǵan deıin Armenııa men Ázerbaıjan beıbit retteý týraly birlesken deklaratsııaǵa qol qoıdy.