«Bul – qazaq jýrnalısteriniń jeńisi!» - respýblıkalyq basylymdarǵa sholý

Keshe Elbasy Nursultan Nazarbaev Keden odaǵy joǵary organynyń, EýrAzEQ memleketaralyq keńesiniń otyrystaryna qatysý úshin Máskeý qalasyna keldi. Osyǵan oraı «Egemen Qazaqstan» gazetinde «Ekonomıkalyq qoǵamdastyq ekinshi kezeńge aıaq basty» degen taqyryppen kólemdi maqala basyldy. Basylymnyń jazýynsha, Keden odaǵy joǵary organy otyrysynyń qorytyndysy boıynsha Qazaqstan, Belarýs jáne Reseı arasynda Birtutas ekonomıkalyq keńistik qurý týraly deklaratsııa qabyldanǵan. «Biz Birtutas ekonomıkalyq keńistik 2012 jyldyń 1 qańtarynan bastap óz kúshine enetinin bekittik jáne oǵan basqa elderdiń de enýine jol ashtyq. Ol bizdi Eýrazııalyq ekonomıkalyq odaq qurýǵa jaqyndata túsedi», - dep atap kórsetken osy máselege baılanysty QR Prezıdenti N. Nazarbaev. Sondaı-aq atalmysh maqalada EýrAzEQ memleketaralyq keńesiniń otyrysy jaıynda da jazylǵan.

«Egemen Qazaqstan» gazetiniń «Ǵylym jáne taǵlym» aıdarynda QR Bilim jine ǵylym mınıstri Baqytjan Jumaǵulovtyń «Eldiń ıntellektisin damytýdyń basty vektory» degen maqalasy jaryq kórdi. Maqalasynda qazirgi ýaqytta bilim berýge jumsalatyn shyǵyndardy áleýmettik qajettilikterge kózdelgen shyǵyndar retinde emes, ekonomıkaǵa salynǵan ınvestıtsııalar dep qabyldaý qajettigin basa aıtqan mınıstr qazaqstandyq qoǵamnyń Bilim berýdi damytýdyń 2011-2020 jyldarǵa arnalǵan baǵdarlamanyń laıyqty iske asyrylýynan zor úmit kútetindigin jetkizgen. «Bul baǵdarlamany bilim berýdiń sapasyn, mazmunyn, qurylymyn, qarjy-ekonomıkalyq jáne basqarý tetikterin jańartý jolynda iske asyrylatyn kúrdeli sharalar kesheni dep qarastyrsaq qatelespeımiz», - deıdi B. Jumaǵulov maqalasynda.

***

Keshe Májiliste «Bilikti zańgerlik kómekke quqyq jáne advokatýranyń táýelsizdigi» taqyrybynda «dóńgelek ústel» ótip, azamattardyń bilikti zańgerlik kómekti tegin alýyna kepildik berýge baǵyttalǵan zań jobasy talqyǵa túsken bolatyn. «Alash aınasy» gazetiniń jazýynsha, depýtattardyń aldynda ázirleýshi tarap - Ádilet mınıstrligi men Advokattar odaǵy birshama «qyrqysyp» qalypty. «Jıyn negizinen talqylaý formatynda uıymdastyrylǵandyqtan, zań jobasyn ázirleýshi tarap pen qujattyń birqatar normasyna qarsy shyqqan advokattar qaýymdastyǵy óz ýájderin barynsha salmaqty etýge tyrysyp baqqanǵa uqsaıdy. Onyń sebebi de túsinikti, qaısy norma bolmasyn Májilis depýtattarynyń «aq degeni alǵys, qara degeni qarǵys» bolatyn túri bar. Óıtkeni, zańnyń túpki nusqasyn da qabyldaıtyn solar. Sondyqtan qos tarap ta shynaıy ári ashyq pikirtalasqa múddelik tanytty», dep jazady basylym. Basylymnyń juma kúngi nómirinde jaryq kórgen maqalanyń baıybyna, sondaı-aq advokattardyń zań jobasynyń keıbir tustaryna kelispeı, ózderiniń táýelsizdigin qorǵaý baǵytynda aıtqan ýájderine qanyqqyńyz kelse, «Advokattar óz táýelsizdikteri úshin kúresip jatyr» degen maqalaǵa nazar salyńyz.

Osy basylymda jaryq kórgen «DSU-ǵa kirýge sanıtarlarymyz qulshynyp otyr» degen kelesi maqalaǵa elordada ótken tamaq óniminiń qaýipsizdigi jáne DSU-ǵa kirýge daıyndyq jónindegi keńes otyrysy arqaý bolǵan. Basylymnyń atap ótýinshe, Astana qalasynyń memlekettik bas sanıtarlyq dárigeri DSU-ǵa Qazaqstan búgin kirse de daıynbyz dep otyrǵan kórinedi. «Qazirgi kezde bizdiń sanıtarlyq qyzmetkerler barlyq jaǵynan daıar. Biz TMD elderi ishinde bul salada oq boıy ozyq turmyz. Sebebi, bizdiń mamandarǵa memleket biliktiligin arttyrýǵa jaǵdaı jasap otyr. Al ol elderde bizdikindeı sanıtarlyq oqý, bilimin arttyrý degendeı joq. Bizde bazalyq negiz jaqsy qalanǵan», deıdi ol. Onyń aıtýynsha, elimizdegi zerthanalar da óte jaqsy jabdyqtalǵan. «Gendik modıfıkatsııalanǵan taǵamdardy, tipti Qytaıdyń melamınmen ýlanǵan sútterin de anyqtaıtyn jabdyqtarymyz bar. Biz qazir zerthanalarymyz kúsheıttik. Keıbir oblystarǵa sol úshin 150 mıllıon teńge qarjy bólindi», - deıdi ol.

***

«Ekonomıkalyq qylmysqa jáne sybaılas jemqorlyqqa qarsy kúres agenttiginiń (qarjy polıtsııasy) Aqmola oblystyq departamenti Tótenshe jaǵdaılar jónindegi mınıstrliktiń Aqmola oblystyq departamenti bastyǵynyń ústinen, «memleket qarjysyn jymqyrdy» degen kúdikpen qylmystyq is qozǵady», - dep jazady «Aıqyn» gazeti búgingi nómirinde jaryq kórgen «Atqaminerlerge aıyp taǵyldy» degen maqalasynda. Basylymnyń atap ótýinshe, Aqmola oblystyq tótenshe jaǵdaılar jónindegi departamenttiń bastyǵy bıyl jazda Býrabaı aýdanynda órt deposyndaǵy qurylys jumystaryn qabyldap alý kezinde 89 mln. teńgelik jumystar aktisine qol qoıǵan eken. Qazir osy fakt boıynsha Qylmystyq kodekstiń 176-baby 3-bólimi boıynsha (senip tapsyrylǵan ózgeniń asa iri kólemdegi múlkin ıemdený nemese talan-tarajǵa salý) qylmystyq is qozǵalǵan. Sondaı-aq Atyraý oblysynda da laýazymdy sheneýnik kúdikpen ýaqytsha qamaýǵa alynǵan kórinedi. Ádilet mınıstrligine qarasty Qylmystyq-atqarý júıesi komıtetiniń Atyraý oblystyq departament bastyǵy Marat Dáýletovke «qyzmettik ókilettigin asyra paıdalandy» degen kúdik keltirilip otyr.

7-qysqy Azııa oıyndarynyń resmı ánuranyn anyqtaý maqsatynda jarııalanǵan baıqaý óz máresine jetip, jeńimpazdyń esimi saltanatty túrde jarııalanǵanynan jurtshylyq habardar. Búkilhalyqtyq tańdaý nátıjesinde 49,5 paıyz daýys alǵan kórnekti kompozıtor Eskendir Hasanǵalıev pen belgili aqyn Ótegen Oralbaevtyń "Azıada alaýy" atty áni Azıadanyń gımni bolyp resmı túrde bekitilgen. Osyǵan oraı «Aıqyn» gazeti mátin avtory, belgili aqyn Ótegen Oralbaevtan alynǵan shuǵyl suhbatty «Bul - qazaq jýrnalısteriniń jeńisi!» degen taqyryppen jarııalady. «Bárińiz bilesizder, baıqaýdyń erejesi boıynsha áý basta "Azıada ánurany úsh tilde oryndalady" degen jospar bolǵan. Oǵan qazaqtildi jýrnalıster aralasyp, dúr silkinip, biraýyzdan qarsy pikirlerin bildirdi. Osy tusta olardyń azamattyq, qaıratkerlik, ulttyq pozıtsııalary qatty kórindi. Sondyqtan ánurannyń memlekettik tilde oryndalýyna, qazaq ániniń tańdaýǵa ıe bolýyna qazaq jýrnalısteriniń úlken úlesi bar. Baıqaýdyń kemshiligin jýrnalıster túzedi. Ánurannyń memlekettik tilde oryndalýy - qazaq jýrnalısteriniń jeńisi dep esepteýimiz kerek. Meniń mátinimniń emes, qazaq ániniń jeńiske jetkenine sheksiz qýanyshtymyn», - deıdi Ó.Oralbaev.

***

Memleket basshysy N.Á.Nazarbaevtyń atyna 2010 jylǵy 1-2 jeltoqsanda Astanada Eýropadaǵy qaýipsizdik jáne yntymaqtastyq uıymy sammıtiniń 11 jylǵy úzilisten keıin alǵash ret joǵary deńgeıde ótýine baılanysty elimizdiń jurtshylyǵynan, stýdentter men joǵary oqý oryndarynyń ujymynan, eńbek ujymdarynan, eńbek jáne soǵys ardagerleri uıymdarynan, ákimder men elshilerden, sondaı-aq zııaly qaýym ókilderinen quttyqtaý hattary men jedelhattary kelip túsýde. Osyǵan oraı «Kazahstanskaıa pravda» gazetiniń búgingi nómirinde solardyń birparasy jaryq kórgen. Máselen, Ońtústik Qazaqstan oblysy, Tóle bı aýdandyq ardagerler keńesiniń tóraǵasy Á.Bektaev hatynda: «Qurmetti Nursultan Ábishuly! Qazaqstan úshin asa jaýapty bolǵan Eýropadaǵy qaýipsizdik jáne yntymaqtastyq uıymyna tóraǵalyq mindetti jáne EQYU-nyń sammıtin úlken abyroımen atqarǵanyńyz úshin aýdannyń ardagerler keńesi atynan shyn júrekten quttyqtaımyn! Osy aýqymdy isteri arqyly Qazaqstan álem elderi aldynda óziniń abyroıyn arttyryp, bedeliniń joǵary ekendigin taǵy da bir ret tanytty», dep Elbasynyń EQYU-nyń sammıtin ótkizýdegi tarıhı róline zor mańyz beredi. Al Aqtóbe oblysy jurtshylyǵy atynan kelgen hatta: «Taǵdyr bizge qandaı synaqty jiberse de, Siz Nursultan Ábishuly, táýelsizdiktiń týyn joǵary kóterdińiz. Shynaıy Ult Lıderi ekenińizdi kórsettińiz. Sondyqtan da álemniń barlyq eliniń memleket basshylary Saryarqa tósinde, Uly Jibek Joly boıynda, Eýrazııanyń júreginde - Astanada jahandyq problemalardy naqty sheshý úshin bas qosty. Búgingi Qazaqstan óz tarıhynyń jańa betterin ashýda. Biz, Qazaqstan halqy, elimizdiń bolashaq urpaqtary bul tarıhty maqtan tutatyn bolady. Biz Táýelsiz Qazaqstandy, onyń halqynyń birligin nyǵaıtýǵa jáne barlyq azamattarynyń ál-aýqatyn arttyrýǵa baǵyttalǵan Sizdiń dana jáne kóregen saıasatyńyzdy árdaıym qoldaı beremiz», delingen.