Jánibek Álimhanulynyń komandasy: Bul - qazaq halqynyń jeńisi

ASTANA. KAZINFORM — Kásipqoı boksshy Jánibek Álimhanuly orta salmaqtaǵy WBO jáne IBF nusqasy boıynsha chempıon ataǵyn sátti qorǵaǵannan keıingi sezimimen bólisti, dep habarlaıdy Kazinform tilshisi.

— Búkil qazaq elin jeńisimen quttyqtaımyn! Osy keshte meni qoldaǵandardyń barlyǵyna alǵysymdy bildiremin. Aldymda úlken jaýapkershilik boldy, óıtkeni jekpe-jek týǵan jerimde, Astanada ótti. Biz kórermenderge keremet jekpe-jek kórsetkimiz keldi. Mine, sizder bul oqıǵanyń kýási boldyńyzdar. Barlyǵyna taǵy da alǵys aıtamyn, — dedi Jánibek Álimhanuly jekpe-jekten keıin.

Onyń menedjeri Berik Sultannyń sózinshe, bul jeńis tek komandanyń ǵana emes, barlyq qazaqstandyqtyń, sondaı-aq Qazaq Style jankúıerleriniń jetistigi ekenin aıtty.

— Bul — tarıhı sát. Biz eki chempıondyq tıtýldy qorǵadyq, endi bizdiń maqsatymyz — barlyq tórt beldikti alý. Biz osy baǵytta júremiz. Turaqty túrde qoldaý kórsetkeni úshin Prezıdent Qasym-Jomart Kemelulyna, sondaı-aq Sport jáne týrızm mınıstri Erbol aǵaǵa (Myrzabosynov — red.), Keńes Raqyshevke rahmet. Bul búkil qazaq halqynyń jeńisi, — dedi ol.

Aıta keteıik, búgin orta salmaqta WBO jáne IBF nusqasy boıynsha álem chempıony, qazaqstandyq kásipqoı boksshy Jánibek Álimhanuly (16-0, 11KO) Astanada ótip jatqan «Battle of the Brave» boks keshiniń basty jekpe-jeginde óner kórsetti. Ol qarsylasyn nokaýtpen jeńdi.

Artynsha Memleket basshysy kásipqoı boksshy Jánibek Álimhanulyn orta salmaqta WBO jáne IBF tujyrymdary boıynsha chempıondyq belbeýlerin sátti qorǵaýymen quttyqtady.