Bul qaı ǵasyrdaǵy mektep: BQO-daǵy mekteptiń jaı-kúıine baılanysty bilim basqarmasy jaýap berdi

ORAL. KAZINFORM — Batys Qazaqstan oblysy Bókeı ordasy aýdany Jetibaı aýylyndaǵy Jambyl bastaýysh mektebi týraly áleýmettik jelide beınejazba tarady. 

Beınejazbada atalǵan bilim oshaǵynda bastaýysh synyp oqýshylary ǵana oqıtyny aıtylady.

— Olar tórtinshi synyptan keıin bilimin aýyldan 500 shaqyrym jerde ornalasqan aýdandyq mektep-ınternatta jalǵastyrady. Jergilikti turǵyndar bul mektepti jyl saıyn ózderi syrlap, aqtap, tazalaıtynyn jazdy. Bilim ordasynyń vıdeosyn kórgen jeli qoldanýshylary: «Mynaý qaı ǵasyrdaǵy mektep?», «Ákim men bilim basqarmasy qaıda eken?», «Qojanyń mektebi budan jaqsy edi ǵoı» dep pikir qaldyrdy, — degen sózder keltirilgen.

Osyǵan baılanysty BQO bilim basqarmasy túsinik berdi.

Bilim basqarmasynan túsken málimetke qaraǵanda, Bókeı ordasy aýdany, Jetibaı aýylyndaǵy Jambyl bastaýysh mektebinde 2025-2026 oqý jylynda 15 oqýshy bilim alyp jatyr, onyń ishinde 1-synypqa 4 bala qabyldanǵan. Oqý úderisin 6 pedagog qamtamasyz etedi. Mektep ǵımaraty 1984 jyly salynǵan, aýdan ortalyǵynan 85, oblys ortalyǵynan 500 shaqyrym qashyqtyqta ornalasqan.

— Mektep Starlink júıesi arqyly ınternetke qosylǵan, eki oqý kabınetinde ınteraktıvti proektor ornatylǵan. Sondaı-aq mektepte 8 sandyq beınebaqylaý kamerasy jumys isteıdi. Barlyq oqýshy tegin ystyq tamaqpen qamtylǵan. Bıyl mektepke aǵymdaǵy jóndeý júrgizildi. 2026 jyly mektep aýlasyna órnektas (brýschatka) tóseý, al 2028 jyly kúrdeli jóndeý júrgizý josparlanǵan, — dep habarlady vedomstvodan.

@qaz365kz

❗️Bul mektep Batys Qazaqstan oblysy, Bókeı orda aýdany, Jetibaı aýylynda ornalasqan. Aqparatqa sáıkes, Jambyl Jabaev atyndaǵy bilim oshaǵynda bastaýysh synyp oqýshylary ǵana oqıdy. Olar tórtinshi synyptan keıin bilimin aýyldan 500 shaqyrym jerde ornalasqan aýdandyq mektep-ınternatta jalǵastyrady. Jergilikti turǵyndar bul mektepti jyl saıyn ózderi syrlap, aqtap, tazalaıtynyn jazdy. Bilim ordasynyń vıdeosyn kórgen jeli qoldanýshylary: «Mynaý qaı ǵasyrdaǵy mektep?», «Ákim men bilim basqarmasy qaıda eken?», «Qojanyń mektebi budan jaqsy edi ǵoı», — dep pikir qaldyrdy.

♬ original sound — Qaz365.kz | Novostı Kazahstana

Jetibaı aýylynyń turǵyny Bısen Ijanov óz pikirin bildirdi.

Onyń sózine qaraǵanda, Jambyl bastaýysh mektebiniń tozyǵy jetip turǵany ras. 2017 jyly kúrdeli jóndeý úshin jobalyq-smetalyq qujattamasy jasalyp, aıaqsyz qaldy. Jyl saıyn áne jóndeledi, mine jóndeledi degen áńgime aıtylady. Jalpy, mektepte bilim sapasy jaman emes. Ózindik tarıhy bar bilim ordasynan óńirge belgili adamdar shyqqan. 

— Aýylda halyq turaqty, kóship ketýshiler joq. Ótken jyly feldsherlik-akýsherlik pýnkt berilse, bıyl klýb salynyp, paıdalanýǵa berilip jatyr. Mekteptiń bir bólmesinde turǵan kitaphana klýbqa kóshiriledi, sonda oryn bosaıdy. Eger jergilikti atqarýshy organdar tarapynan turaqty kóńil bólinse, mundaı jaǵdaıǵa jetpes edi. Mektep eski bolsa da, muǵalimder Bilim kúnin durystap uıymdastyrýǵa bolatyn edi ǵoı. Jalpy, bul talap pen baqylaýdyń oıdaǵydaı emestigin kórsetedi, — dedi Kazinform tilshisine Bısen Ijanov.

Eske sala keteıik, budan buryn Oralda ashylýy tıis keleshek mektebi nege merziminde berilmeı qalǵanyn jazǵan edik.