Bul qasireti men qaıǵysy kóp soǵys boldy - maıdanger barlaýshy Qambar Sársen

ALMATY. 9 mamyr. QazAqparat -Jeńis kúni qazirgi TMD elderindegi eń negizgi mereke. Maıdanger barlaýshy Qambar Ámiruly búgin Almatydaǵy 28 panfılovshy-gvardııashylar saıabaǵyndaǵy Máńgilik alaý mańynda ótken Ekinshi júnıejúzilik soǵys qurbandaryn eske alý rásimi kezinde osyndaı pikir bildirdi.

«Soǵys jáne tyldaǵy eńbek ardagerleriniń Uly jeńiske qosqan úlesi birdeı. Ony bólip-jarýǵa bolmaıdy. Biz artymyzdaǵy kúshti sezinip, sonyń arqasynda ǵana jaýdy jeńdik. Men 1942 jyldan bastap birinshi, ekinshi Prıbaltıka jáne úshinshi Belarýs maıdandarynda soǵysqa qatystym. Úsh ret jaralanyp, 1945 jyly soǵys bitken soń elge qaıttym», - deıdi Qambar Sársen. Maıdanda  51-shi atqyshtar dıvızııasynyń 30-shy barlaý rotasynda barlaýshy bolǵan qart maıdangerdiń aıtýynsha, 1945 jyly jaý berilgennen keıin olar Polshada ultshyldarmen mamyr-maýsym aılarynda 2 aı soǵys júrgizgen. Soǵysty Jeńispen aıaqtap, endi az kúnde  úıge oralamyz dep júrgen birqatar maıdandastary osy kezeńde  oqqa ushqan kórinedi. «Soǵys taýqymetin  endi búgingi urpaq kórmese eken. Ol bizben birge joıylsa dep tileımin. Men ózimdi baqytty adammyn dep sanaımyn. Óıtkeni elim azat, urpaǵym beıbit kezeńde ómir súrip jatyr», - deıdi ul-qyzynan nemere súıip otyrǵan  ardager.